Sfuei Mensîl Furlan Indipendent
Archivi de Patrie

Bypass par salvâ il Lât di Cjavaç

............

Barazzutti: «La opare e podarès deventâ une soluzion esemplâr in dut il mont»

Lât dai Trê Comuns, une valade che e va salvade. Il futûr dal plui grant bacin naturâl furlan al dipent di ce che si tacarà a fâ vuê, e di cemût che si lu puartarà indenant tai prossims agns. L’obietîf nol è facil: evitâ che la Val dal Lâc e deventi un palût. Il pericul al è aromai cognossût: lu confermin i studis fats cualchi an indaûr dal professionist Marco Garzon che, par cont dal Comun di Trasaghis, al veve fate une indagjin sul stât dal bacin furlan, cuant che si fevelave dal dopleament de centrâl Edipower di Somplât. Tal zîr di 110 agns, chel lât al è destinât a deventâ une poce di pantan se no si fâs alc: chestis lis conclusion dal espert Garzon che za al veve lavorât ancje pes Provinciis autonomis in Trentin tal cantin idric. L’inzegnîr Dino Franzil dai Comitâts a difese dal lât al jere rivât a conclusions similârs. «Che a sedin 100 o 150 i agns nol impuarte cumò – al dîs Franceschino Barazzutti dai Comitâts a difese des aghis de mont -, ce che al conte al è che no podìn lassâ une robe dal gjenar aes gnovis gjenerazions».

Te Vierte passade, a Trasaghis a àn presentât i risultâts des indagjins dadis fûr dal Istitût di Siencis marinis di Bologne, dulà che i lôr tecnics a àn fat ancje carotaments dal pantan che si cjate sul fonts dal lât: ben, no dome la cuantitât e fâs pensâ, ma al somee che sot di chel pantan al puedi pardabon gjenerâsi gas metan, sostance che e gjave ossigjen, cun consecuencis seriis pal ecosisteme naturâl.

Di chi si capissin lis conclusions di Garzon e di Franzil: la uniche soluzion e je chê di creâ un bypass che al cjapi la corint de aghe che e ven jù dal scaric de centrâl di Somplât e che le puarti tal canâl di scolament dal lât, su la bande Sud. Ta cheste maniere, la aghe turbinade no larès a comprometi il fonts dal bacin che al tornarès a naturalizâsi cu lis corints che par secui lu àn implenât in maniere naturâl. Su cheste cuistion, inmò in Lui aministradôrs e comitâts si son cjatâts su la spuinde Ovest dal lât cui gnûfs sorestants regjonâi: in chê ocasion a jerin i assessôrs regjonâi pal Ambient, Fabio Scoccimarro, e al Belanç, Barbara Zilli, che si son confrontâts cun Franceschino Barazzutti e cui comitâts, presint ancje il sindic di Trasaghis Augusto Picco.

In spiete dal concors di ideis

In dì di vuê, il Plan regjonâl di tutele des aghis al individue la necessitât di inviâ un progjet par frontâ la situazion dal Lât di Cjavaç, cognossût ancje tant che “dai Trê Comuns”, e par chest la Regjon e veve stanziât ae Uti dal Glemonàs 50 mil euros par inviâ il concors di ideis indreçât a cjatâ une soluzion. Te ocasion dal incuintri sul lât, al è stât domandât che la Regjon e cjapi in man la formulazion dal concors di ideis, par vie de impuartance di une opare di dimensions consistentis. Ta chescj mês, i uficis regjonâi a àn inviade la preparazion dal bant pal concors di ideis pal bypass dal lât: i comitâts a àn fat indenant il non di Giorgio Cavallo tant che tecnic che ju rapresentarà te comission che e varà di judicâ lis propuestis dai professioniscj che a parteciparan.

I Comitâts: «Cul bypass, aghe a disposizion de agriculture»

«Al è clâr – al dîs Franceschino Barazzutti – che par rivâ adore a fâ une opare cussì si varà di lavorâ suntun program european, ancje parcè che e podarès deventâ une soluzion esemplâr in dut il mont, viodût che no sin dome nô a vê di chescj problemis». Il bypass sul Lât di Cjavaç no dome al rivarès a sanâ in maniere decisive une feride fate al sisteme idric furlan tai agns Cincuante cul intervent de Sade (o ricuardìn che il risi di sparî dentri dal pantan al vâl ancje pal Lât di Verzegnis, in Cjargne), ma al vignarès incuintri ancje ae agriculture: za di timp, il Consorzi di bonifiche de plane furlane al domande di cjapâ sù la aghe da Lât di Cjavaç tal canâl di Vasinis, par evitâ di lassâ il Tiliment cence, viodût che le cjape a Ospedalet di Glemone.

Di bande dai comitâts, la rispueste e je clare: «Fat il bypass, chê aghe turbinade e podarès jessi metude a disposizion de agriculture cuntun colegament sot dal Tiliment, viers la plane di Osôf e Glemone».

Une manifestazion cuintri dal sfrutament des aghis

Di sisteme idric furlan e di sfrutament des risorsis si fevelarà ancje intune manifestazion promovude dal Grup Consiliâr dal Pat pe Autonomie, che si davuelzarà in Otubar sul Lât di Cjavaç li che a son invidâts a partecipâ citadins e aministradôrs locâi, associazions ambientalistis e comitâts teritoriâi impegnâts te difese dai cors di aghe regjonâi (pe date e ore, si puedin domandâ informazions clamant il numar 040/3773386 o visitant la pagjine Facebook dal Grup Consiliâr). «Il probleme dal Lât di Cjavaç – al dîs il cjâf grup regjonâl Massimo Moretuzzo – al è un dai tancj che a tocjin la gjestion dal sisteme idric regjonâl, dulà che nô o domandìn che si fasi une moratorie su lis concessions pe derivazion, e che si meti in pîts une societât eletriche regjonâl che e puedi partecipâ ai bants pe concession di sfrutament, cuant che a scjadaran tai prossims agns. E je la uniche maniere par salvâ il nestri ambient e par impedî che i profits de produzion di energjie eletriche a finissin par insiorâ societâts di fûr de regjon». ❚

Piero Cargnelutti

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +