Scozês, galês e nordirlandês no i stan.
Ancje Comuns e Lords lu àn sierât intun cjanton
Di sù par jù doi mês il Ream Unît al à un gnûf prin ministri. Ai 24 di Lui Boris Johnson al à cjapât il puest di Theresa May e si à insedât li dal numar 10 di Downing Street a Londre.
Fin dai timps dal referendum dai 23 di Jugn dal 2016 l’esponent dal partît conservadôr al è simpri stât a pro de jessude de Union Europeane de bande de Grande Bretagne e propit par vie di cheste sô posizion al è deventât premier, rivant a vê la poie de maiorance dal so partît. Chel che al è cognossût tant che un “ultrà” de Brexit, ancje inte sô gnove incarghe istituzionâl al manten ad in plen cheste sô vision. Lu à sclarît intant dal so prin discors di premier te aule di Westminster, là che al à tornât a bati su la necessitât di sierâ la cuistion de Brexit dentri de fin di Otubar, cuntun acuardi cun Bruxelles o ancje cence di chel.
Johnson al va dilunc a fâ la muse triste cu la UE. Jenfri des sôs menacis e je chê che il Ream Unît al taiarà i puints cul continent ancje se no si rive a un acuardi bon par Londre e juste par chel nol paiarà i debits che al à cu lis istituzions de Union, che a son sù par jù 39 milions di sterlinis (42 milions di euros). L’argoment dai bêçs al jere stât fat indenant di Johnson za timp indaûr, cuant che al jere segretari di stât pai afârs cul forest e pal Commonwealth. In cualchi ocasion, cun chê di fâ la muse triste cuintri de “euroburocrazie” e cul intindiment di scjaldâ il cûr de opinion publiche a pro dal leave, al veve fintremai declarât che Londre no veve nuie di tornâ a Bruxelles e che impen e jere in credit cu la Union.
Di cuant che al è premier, sei in direzion di Bruxelles e di Strasburc sei viers dai citadins dal Ream Unît, Boris Johnson al alterne la muse triste e chê dal dialic. Di une bande al bat su la scjadince ultime dai 31 di Otubar e di chê altre al mostre di crodi che si rivarà a di un acuardi e duncje che la opzion no deal si à di calcolâle tant che minimâl e residuâl.
La cuistion e je stade argoment di discussion ancje in bande dal G7, che si à davuelt dai 24 ai 26 di Avost a Biarritz, tal Paîs Basc francês, là che Johnson al à tocjât l’argoment fevelant cul president de Republiche di France, Emmanuel Macron, e cu la canceliere todescje, Angela Merkel. Si podarès dî: une gnove conferme de rilevance de impostazion intergovernative de UE.
Johnson al va dilunc a zuiâ la sô partide, ancje se tal Ream Unît vie pal ultin an al è cressût il numar di chei che a son cuintri de Brexit. No dome te Scozie e te Irlande dal Nord, là che in ocasion dal referendum al veve vinçût il remain, ma ancje tal Gales, là che il leave al veve la maiorance relative, e in Ingletiere, là che – comprendude la Cornualie e cu la ecezion de zone di Londre – i brexiters a vevin vinçût.
Cheste dinamiche e je presinte ancje dentri dai partîts britanics, cui laburiscj, in particolâr, che a àn fat indenant, ancje se no si capìs cun cetante convinzion, la propueste di un referendum gnûf su la partecipazion britaniche ae Union.
Par chel, cun chê di sghindâ cualsisedi iniziative a pro di une proroghe gnove de jessude de UE o fintremai a pro de metude in discussion de Brexit, Boris Johnson al à otignût che il Parlament britanic al resti fer fin ai 14 di Otubar. Cundut achel, i à lade strucje, par vie che i siei plans a àn cjatât la oposizion de int che e je lade in place par protestâ e intes dôs cjamaris, là che al è stât prontât e fat bon di buride, prime dal stop, un proviodiment cuintri dal no deal e a pro di un altri sprolungjament des negoziazions.
Johnson al à zuiât ancje la cjarte des elezions anticipadis, ma i Comuns e i Lords i àn tornât a fâ cuintri e lu àn sierât intun cjanton. La sô posizion, che e jere fuarte e salacor prepotente intes primis setemanis dal so guvier, dopo dal principi di Setembar e somee avonde clopadice. E nol è par nuie sigûr che ae fin di Otubar il Ream Unît al molarà la UE. ❚
Marco Stolfo
