Le gnove ativitât sportive, che si ispire a la bale tal zei, e met dongje zuiadôrs cun diviersis abilitâts a int normâl, cun regulis di pueste par coinvolzi ducj. In Friûl il prin riferiment al è Alberto Andriola
Il “Baskin” al è une gnove ativitât sportive che a parie la bale tal zei che ducj a cognossin, cun lis prerogativis di une ativitât motorie di pueste par personis cun disabilitât (al è a vonde che rivedin a tirâ une bale in tal zei), oms e feminis cence distinzions di gjenar. Se a si vûl doprâ un adietîf bessôl, al si clame ativitât “inclusive”.
◆ Il fat che in Friûl il “Baskin ” al sedi cognossût e che, cumò, al vedi une organizazion, un campionât, al è par merit dal professôr Alberto Andriola, insegnant di educazion fisiche a scuele, par tancj agns alenadôr di formazions furlanis di bale tal zei, ancje a nivel nazionâl. Andriola al à metût su, insiemi cun altris personis, le Associazion Zio Pino Baskin Udin: un pont di riferiment par ducj chei che a àn voie di dedicâsi a cheste ativitât, sedi come atletats, sedi come dirigjents, sedi come tifôs.
◆ “Cualchi an indaûr – al conte il professôr Andriola – o lavi cirint une oportunitât par cambiâ alc in ta lis lezions di educazion fisiche, par coinvolzi par da bon ducj e cjatâ il mût di fâ zuiâ ducj insiemi personis cun carateristichis diviersis. Par merit di dôs peraulis justis dal gno amì Massimo Maggiore, che al mi à sustât, mi soi inacuarzût di trop biel che al è il Baskin. In ta chei timps, o vignivi fûr di problemis di salût e cuant che o ài viodût il prin filmât o ài capît di bot che al jere une robe di seguî e di provâ a puartâ in Friûl. O ài cognossût chei che a lu àn inventât: int di Cremone che, bielzà in tai prins agns di chest secul, a vevin metût adun lis regulis che cumò a fasin il sucès di chest sport”.
__
Dit e fat, in curt, al si è tacât a zuiâ in ta la palestre dal Istitût Bearzi, a Udin, propit indulà che Alberto Andriola al lavore.
“A la svelte, zontant amîs, zuiadôrs, zovins e mancul zovins cun disabilitât e curiôs, o vin tirât su un biel moviment. Lis primis scuadris a àn tacât a zuiâ subite e, in tal 2019, o vin metût adun la Sezion Teritoriâl dal Baskin, colegade cun che Nazionâl. Lis sodisfazions a son rivadis in curt, ancje parcè che l’entusiasim e la passion che ducj a àn dimostrât bielzà in tai prins timps, a nus à dât ancjemò plui slanç.
__
Parcè il Baskin al ti cjape cussì tant?
“Parcè che al è une dissipline che a rive a meti adun personis diviersis, cun capacitâts e abilitâts une vore diferentis. E al ti dâ un pont di viste ledrôs su la disabilitât. No si cjale a ce che l’atlete disabil al no rive a fâ: al è ce che al rive a fâ sul cjamp che al conte par la scuadre e in ta l’economie dal zûc. Ducj a àn compagne pussibilitât di rivâ a sburtâ la bale dentri dal zei, seconde da la abilitât. Pense tu, ancje in ta la vite normâl di ducj i dîs, a si cjatin dificoltâts e a si scuen resonâ cun chei altris par fâ tantis robis, daûr di ce che a si cumbine. Il Baskin al è come la vite: ognidun al dâ ce che al rive e cun le colaborazion a si otegnin risultâts. Miôr che a si matee insiemi, plui indenant a si va. E, dut câs, al è un sport e ven a stâi che a si zuie par vinci la partide e par fâ viodi di jessi plui fuarts dai aversariots. Cun dut ce che al ven daûr: impegn, passion, spirt agonistic”.
__
Cumò, cuale ise la situazion dal Baskin a Udin?
“O sin lâts plui in là di dutis lis miôr previsions che o vevin in tal principi. Daspò da la pandemie, che a nus à blocât un tic, o si rivâts a meti adun trê scuadris, sot dal segnacul da la Associazion Zio Pino. Contin plui o mancul cincuante tesserâts che a zuin daûr da lis abilitâts. Cul vê trê scuadris o sin sigûrs che ducj a puedin divertîsi par da bon. Le prime scuadre a à vinçût il titul regjonâl e, in ta lis ultimis finâls nazionâls o sin rivâts a bati Bologne, pierdint dome cun Pesaro che, daspò, a à pierdût la finâl par il scudet cun Cremone. Ven a stâi che o sin competitîfs. La tierce scuadre a conte dome zuiadôrs sot dai disevot agns e a son daûr a fâ esperience. Cetante sodisfazion le vin vude cuant che a nus àn invidâts a Rome, par zuiâ la prime partide uficiâl di Baskin in tal Lazio. O vin fat la storie! O vin ancje vinçût cuintri Pistoia e o sin braurôs di vê mateât par fâ cognossi la dissipline ancje in ta la Capitâl d’Italie”.
__
E plui in gjenerâl, il moviment in Regjon cemût al vadie?
“O contin plui di dîs scuadris e tresinte tesserâts di bot. Tantis societâts di bale tal zei a àn ativât la sezion dedicade al Baskin e plui di une a à metût su dôs scuadris. I numars a son in cressite par dut. O sin daûr a tirâ su ancje chel che al si clame “Baskin Children”, di no cjapâ come “Minibasket”. In sostance, al è un Baskin cun regulis un pôc diferentis, par judâ i plui piçui a divertîsi di plui”. ❚
::::::::::::::::::::::::::::::::::::::::::::::::::::::::::::::::::::::::::::::::::::
Tancj events par fâ cognossi la dissipline e par sburtâ bande la inclusion. Manifestazions, cunvignis, didatiche e musiche fin a Nadâl
Ai 3 di Dicembar, a si ten la zornade mondiâl da la disabilitât e la Associazion Zio Pino Baskin, insiemi cun ducj i colaboradôrs e i dirigjents, e à metût adun un programe cun tancj events par secondâ la sensibilitât da la int su lis conotazions dal Baskin.
◆ In tal prin fin setemane dal mês al si zuie il torneu dedicât al musicist e cjantant Pierangelo Bertoli. Passâts vinç agns di cuant che al è muart, l’artist emilian, che al jere sentât su une carocine par vie di une malatie, al à lassât tancj test e cjançons di nivel e di impat che a fevelin di inclusion, di sperance, di amôr.
◆ Sul cjamp dal Bearzi a zuin i parons di cjase da la Zio Pino, il Baskin Padue, il NewBaskin Jesi e i campions d’Italie dal San Michele Baskin Cremone. Il cuadrangolâr al è finanziât da la Regjon Friûl Vignesie Julie e da lis risorsis da lis Societâts. Un lavôr compagn di chel che al à puartât a l’inaugurazion di dôs cjamps, dedicâts juste ben al Baskin, a Felet e a Pagnà.
◆ Il 6 di Dicembar, simpri in tal istitût Bearzi, a si ten une cunvigne cun protagonist il dotôr Ernesto Gianoli, diretôr da la scuele di psicoterapie di Vignesie. Il luminâr al à di fevelâ dal rapuart jenfri gjenitôrs e fîs, mestris e alievos, alenadôrs e atletats.
◆ Il 10 di Dicembar, Alberto Bertoli, so fi di Pierangelo, al cjante al teatri Palamostre di Udin, lis cjançons dal pari.
◆ Dut ce che la Zio Pino Baskin a vûl rimarcâ al è resonâ su trop che il sport inclusîf al po jessi un strument di incuintri di diversitâts. Dentri di un ambit di confront agonistic che al vedi come obietîf la cognossince e l’amicizie. Cun dut che ancje la cunvigne e il spetacul di Alberto Bertoli a fasin viodi l’impuartance dal concet di gjenitorialitât. ❚
:::::::::::::::::::::::::::::::::::::::::::::::::::::::::::::::::::::::::::::::::::::
Lis regulis par fâ zuiâ ducj pardabon
Il cjamp di zûc dal Baskin al è il stes da la Bale tal zei. Dome, a si zontin dôs zeis laterâi, plui bas. A si zuin cuatri periodots di 8 minûts par un, cul balon dal minibasket. Ogni scuadre a met dentri 6 zuiadôrs, al mancul doi cun une disabilitât. Ducj i zuiadôrs a scuegnin jentrâ in cjamp prime dal tierç periodi, par no pierdi la partide cul risultât di 40-0.
◆ I zuiadôrs a àn un numar, dal 1 al 5, seconde la sô abilitât e disabilitât. Dut câs, la sume dai numars dai zuiadôrs sul cjamp a no po jessi mai plui di 23. Une scuadre a à un timp cence limits par sierâ une azion, in tai prins trê periodots; e à dome 30 seconts in tal ultin periodi.
◆ Daspò, a son limitazions in tal timp a disposizion di un zuiadôr par trai la bale in tal zei cuant che al è dentri da le aree e su lis sbalizadis e i pas che un al po fâ.
◆ I zuiadôrs cence disabilitât a podin trai la bale dome in tal zei plui ad alt e in difese a si po mateâ dome cuintri aversariots cun il stes numar. Come in ta la bale tal zei, a son 5 i fai personâi par ognidun, prime di butâlu fûr da la partide.
◆ E, ultime regule, i numars 4 e 5 a puedin fâ massime trê tîrs par timp e i numars 1, 2 e 3 a puedin sburtâ la bale massime trê voltis par timp dentri dal zei. ❚
