E je scomençade la edizion numar 26 di Avostanis, la storiche rassegne culturâl che e cjape dentri musiche, teatri, art figurative, plastiche, danze, presentazion di libris, dialics cun esperts e cu la int, par tantis formis di condivision e di scambi tai cjamps dal sociâl. Un lunc festival che chest an al va dal Prin di Avost ai trê di Setembar, curât de Associazion Culturâl Colonos di Vilecjaze di Lestize, cu la direzion artistiche di Federico Rossi.
Il titul di cheste edizion al è “Implosion”. Une Vierte che e tache dal didentri, une scosse interne par une indagjin de contemporaneitât, ae lûs dai sconvolziments sociâi, economics, morâi, e inte fede di une vie di jessude, di miorament. Il titul nol pues no fâ pensâ aes vueris e ai atentâts, che a figurin come tons dal didentri de civiltât. Une implosion che e je cjamade ancje di un lusôr che al pues mostrâ lis pussibilis direzions par une vite miôr, condividude cun dutis lis culturis, tal rispiet des identitâts.
Dodis apontaments li tal Agriturisim Colonos a Vilecjaze di Lestize. Un lûc, sedi tal viert tal curtîl o intes salis internis, che ben si preste, e di simpri, al incuintri e al confront. Ospits artiscj furlans e no dome, par un festival abituât a slargjâsi al nazionâl e al internazionâl, dulà che art, sience, tecnologjie, antropologjie e diviersis altris dissiplinis, si discutin e si misclicin – in particolâr mût chest an -, cun variis performances su temis fondants. Concierts, provis viertis, events artistics in forme di gare, mosaics culturâls, laboratoris performatîfs, par un cantîr viert e simpri in atîf.
Scree martars al 1 di Avost aes 21 cu la famose cjantante Alice, intun recital dal titul Dut ‘l è nuie, cun Antonello D’Urso aes ghitaris e aes programazions. Un repertori in lenghe furlane, par oparis musicadis su tescj di poetis o gjavadis dal patrimoni des vilotis, dut incentrât sui temis di cheste edizion di Avostanis. A seguî, vinars ai 4 di Avost aes 21e vignarà inaugurade la esposizion Cartons animâts, direzût di Chris Gilmour, cun in mostre lis oparis dal laboratori realizât in colaborazion cul Dipartiment di salût mentâl di Udin, cun intervents di Donatella Nonino, Vania Gransinight e Angelo Bertani. Lunis ai 7 e Joibe ai 10, simpri aes 21, e larà in sene la leture, in dôs parts, dal romanç di Stefano Moratto Kebar Krossè. Un lavôr in lenghe furlane sperimentâl, che al conte di une citât sierade, cenglade di un desert indecifrabil e mortâl. Ai recite Massimo Somaglino, Marta Riservato e Elvio Scruzzi. Musichis di Vittorio Vella e Mirko Cisilino.
Tantis lis ativitâts in sene e in mostre, leadis dutis al teme condutôr de implosion. No rivant a nomenâlis dutis, o din un cuc aes plui curiosis, tant che il laboratori performatîf di lunis ai 21 di Avost aes 13.30, viert a dute la popolazion e dal titul “Il compuartament sociâl dai animâi videoludics/Conolos studies”. Ideât e diret di Mauro Ceolin, cul coordenament coreografic di Martina Tavano, il spetacul-laboratori al continue il lavôr scomençât l’an passât, dulà che cuatri balarins a impersonificavin personaçs dal imagjinari coletîf tant che Snoopy, Pikaciu, Michey Mouse. Cheste volte chestis figuris a son daûr a discuvierzi la riproduzion, la alimentazion, la societât.
Lis provis viertis di culture furlane a son martars ai 22 di Avost, aes 21. Un mosaic culturâl cun tantis figuris de culture e de storie furlane e cjants cul trio Vocinconsuete. Interessant ancje l’incuintri a vôs alte “La morfologjie dal vueit e la gramatiche da la rinassite”, riflessions di Angelo Floramo, Stiefin Morat e Giuliana Musso, cun musichis di Francesco, Nicola e Federica Tirelli.
Il programe al va indevant in Setembar e dutis lis informazions e si puedin cjatâ lant sul sît: www.colonos.it
✒ Alessio Screm
……………………………………………………………………….
Focus: il vueit e la rinassite
Martars ai 29 di Avost aes 21 inte sede dai Colonos, Angelo Floramo, Stiefin Morat e Giuliana Musso e saran insiemi par des riflesions di grande atualitât, tiradis dentri tal stramp titul: La morfologjie dal vueit e la gramatiche da la rinassite.
Intune epoche che il vueit al somee ch’al vedi la paronance, glotint e trasformant dut, si presente la necessitât di une riapropriazion di formis e di contignûts bogns di rivendicâ lis urgjencis dal esisti. Casermis, bibliotechis, placis, capanons di periferie e stazions a segnin topografiis incuietis ch’a somein simpri di plui come la proiezion di une societât al limit da la catastrofe, sogjete a metamorfosis no prevedibilis, dominade da l’irazionalitât o piês da l’indiference.
Cuintri da la presunzion dal “antropocene” che si fagocite di bessôl, si sint l’urgjence di une rifondazion che e sepi soflâ ancjemò il sofli dal contignût dentri da lis evoluzions da la forme. Dôs vôs impuartantis si incrosin fra di lôr, stimoladis di Angelo Floramo: Giuliana Musso e Stiefin Morat. No si trate di un dibatit ma di un spazi di libertât assolude dulà che ognidun al è bon di regalâ l’emozion dal pinsîr daûr dai impuls plui conaturâts al propri dî: parce che tirâ vie al vûl dî liberâ, e disvuedâ e pues jessi une oportunitât rare par jemplâ. (Gjavât dal sît: www.colonos.it)
✒ A. Sc.
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +