Sfuei Mensîl Furlan Indipendent
Archivi de Patrie

Autonomie… ridi par no vaî

............

Autonomie? Specialitât? Se nol fos di vaî, al vignarès di ridi. Intes ultimis setemanis si fâs strade intal grant dibatiment su lis riformis istituzionâls la ipotesi (aromai plui di une ipotesi, al pâr) di une macroregjon, là che però – a sigurin components autorevui de Comission incargade di studiâ il futûr asset – il Friûl al podarès gjoldi di une autonomie “maiorade”. Ancje se chest al sucedès, a ce coventaressial, ancje ae lûs des novitâts economichis istituzionâls? Pont prin: o regjistrìn che aromai il F-VJ al è daûr a disfâsi. Pazience vê pierdût intai agns il control dal setôr finanziari (la svendite des bancjis) e des multi utilities (se la energjie e pâr un element secondari…): aromai e je lade, dibant vaî sul lat butât, si podarès dî, tant par visâsi che ancje il setôr dal lat e dai siei derivâts aromai nol è cuasi plui afâr nestri (lei ae vôs: Latterie Friulane-Parmalat). Ma cumò o sin al paradòs: Triest e Gurize a àn creât za rapresentancis unichis par ce che al tocje Confindustrie e Cjamare di cumierç, Pordenon e Udin a procedin inte operazion “Harakiri”: dividûts su dut, di Confindustrie (Pordenon pluitost che “maridâ” Udin al trasferirès la sede su Marte, ma il Venit par fortune al è plui dongje), ae Cjamare di cumierç (Udin, fuart dal fat di racuei cuasi la metât des impresis regjonâls, al riclamarès il dirit di ospitâ la sede), ae unificazion des Fieris che tancj bêçs publics (e duncje nestris) a son costadis fin cumò…
Dut chi? No, trancuîi. Parcè che za in curt si podaressin anunziâ novitâts sul front di viabilitât e traspuarts: Autovie Venete, cuntun slungjament “golôs” de concession, al podarès jentrâ a fâ part dal Pôl autostradâl dai Nord, là che ben si sa cetant “pês” che al podarès vê; intant che l’aeropuart regjonâl di Roncjis di Monfalcon al podarès jentrâ inte orbite de Save, dopo tancj agns di tire e mole. Insume, altris centris decisionâi che si slontanin.
Intant o regjistrìn une altre vitorie dal autonomisim ae F-VJ: la jevade dal Fonts disvilup Pmi – dai Nordest, dal sigûr – che al sarà gjestît di Fvg Sgr, societât nassude de colaborazion tra Veneto Sviluppo (51%) e Friulia (49%), iniziative li che al partecipe ancje il fonts pension dal mont produtîf venit Fondo Pensione. Dotazion: 50 milions plui o mancul, e di chei une ventine di Veneto Sviluppo, 21 di Friulia e plui di 7 dal Fondo Pensione Veneto. Secont indiscrezions di stampe, a saressin 870 lis impresis potenziâls “target” dai invistiments, stant a carateristichis di faturât, Ebitda e altris parametris cjapâts in considerazion: di chestis, 738 a son dal Venit e dome lis restantis 132 dal F-VJ. Domande: ma se i invistiments intes Pmi locâls ju decît dopo cheste societât “miste”, a ce coventie Friulia? E ancjemò: cemût vignarano decidudis pardabon, di là des assicurazions di façade, lis destinazions dai invistiments (stant che, di là di dut, il Venit al controle il 51% de Sgr)? Tant altri si podarès ancjemò domandâ, ma a chest pont al è dut relatîf…
La Regjon dut câs e à decidût di tornâ a fâ ancje “in maniere autonome” politiche industriâl, midiant de leç clamade “Rilancimpresa”. Tantis bielis misuris: Agjenzie pai invistiments, voucher pe inovazion, contrats di insediament, abatiment de Irap, riassestament dai Consorzis industriâi, coordenament dai struments finanziaris e pe internazionalizazion…  Laut dai Industriâi, ma la Confapi regjonâl, par esempli, pûr ricognossint i aspiets positîfs dal proviodiment, midiant dal propri president Massimo Paniccia, e evidenzie che la norme e lasse ai margjins la industrie regjonâl des costruzions, «che, pe centralitât rivistide ancjemò intes dinamichis di dute la economie, e je chê in stât di determinâ un cambi di marce bande la riprese e il disvilup». Secont Paniccia «il limit plui grant de leç al è inte pocje dotazion finanziarie, 13 milions in dut, che no pues jessi calcolade suficiente a rimeti in moviment la industrie des costruzions inte situazion di prostrazion pe stasi dai invistiments publics e la stagnazion di chei privâts. Al coventarès – al zonte Paniccia – un stanziament in plui di 35-40 milions e un slargjament consecuent dai beneficiaris, simpri restant l’ambit de ricualificazion, in câs slargjant i incentîfs ancje al patrimoni di interès storic e culturâl». Viodudis lis puaretâts di belanç regjonâl e i orientaments di cumò, par intervents urgjents, citofonâ Veneto Sviluppo… Cuissà. ❚
Linux

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +