Sfuei Mensîl Furlan Indipendent
Archivi de Patrie

AutodetermiNatzione e Pat pe Autonomie, la alternative ai partîts talians

............

.
.

Analogjiis e diferencis tra i doi progjets gnûfs nassûts in Sardegne e in Friûl
Lis clamavin “nazions cence stât”, “coloniis internis” e “nazions improibidis”. Al passe il timp, a cambiin i contescj e a mudin lis situazions, ma chês etichetis, dopradis une vore dispès agns indaûr par definî la Sardegne e il Friûl, a somein ancjemò buinis in dì di vuê par fevelâ di chestis realtâts. Chest al vâl soredut par marcâ une schirie di elements che a son comuns a chê e a chel, a tacâ des specificitâts linguistichis e culturâls e de maniere che a son stadis minorizadis, scjafoiadis e dineadis, de rilevance des servitûts militârs e dai condizionaments che al à patît il lôr disvilup sociâl e economic, des rivendicazions di ricognossiment e di autoguvier, des mobilitazions politichis e de dibisugne di organizazion e di rapresentance.

Propit tal cjamp politic si puedin vualmâ un trop di analogjiis e salacor ancje cualchi diference di fonde tra Sardegne e Friûl. Dutis dôs lis musis di cheste medaie si àn palesadis in ocasion des elezions dai 4 di Març stâts pe Cjamare e pal Senât de Republiche taliane, là che in particolâr si àn presentadis, pe prime volte, dôs listis metudis adun juste cun chê di dâ une rapresentance autentiche e specifiche al teritori e ae sô int, in maniere distinte e alternative rispiet ai partîts talians, ven a dî AutodetermiNatzione e Pat pe Autonomie.

.
.

Doi percors paralêls

Un prin grup di afinitâts tra chestis dôs esperiencis si le cjate tal percors che a àn daûrsi e tal fat che a mostrin di volê jessi fuarcis politichis struturadis. Se tal Pat pe Autonomie si àn dât dongje aministradôrs locâi e grups politics e associatîfs di aree autonomiste furlane, dopo une schirie di incuintris publics di confront e di aprofondiment tematic in cont dai diviers aspiets che a tocjin l’autoguvier teritoriâl, fats vie pai ultins doi agns e mieç, tal câs di AutodetermiNatzione la strade fondative e je stade sù par jù compagne, te forme e tai timps, cul incuintri tra entitâts associativis gnovis e fuarcis politichis che a esistevin bielzà.

In ducj doi i câs al è stât impuartant il contribût di tancj di lôr che no jerin dentri di organizazions za struturadis, cundut che daûr (in tiermins cronologjics) e dentri (par ce che al tocje la struture organizative) di AutodermiNatzione al è pussibil ricognossi une componente plui fuarte di partîts o moviments za atîf tal teritori, tes competizions politichis e tes istituzions, tant che IRS (Indipendèntzia Repùbrica de Sardigna) e SNI (Sardigna Natzione Indipendentzia), cuant che pal Pat pe Autonomie chest al vâl dome par Patrie Furlane, intant che tancj di lôr a àn esperiencis soredut di aministradôrs locâi.

A son diviers i ponts di contat ancje sul plan programatic: lis cuistions che a tocjin i bêçs e duncje i rapuarts finanziaris cul stât centrâl, il teme de scuele e dai dirits linguistics e chei dal lavôr, dal welfare, dal ambient e des autonomiis locâls, cuntune critiche di fonde viers des politichis metudis in vore in ducj chescj setôrs de bande des diviersis maiorancis politichis che a àn rezût lis regjons Sardegne e Friûl-Vignesie Julie vie pai ultins dîs agns.

Programs, contescj e risultâts

Tai programs e te comunicazion si rive a vualmâ ancje cualchi diference di fonde, che e diven soredut des specificitâts des dôs realtâts, sedi sul plan istituzionâl che par ce che al tocje la situazion politiche, economiche e sociâl. Stant che no esist nissune regjon Friûl, daûr di une logjiche “teritoriâl e istituzionâl” il Pat pe Autonomie al scuen vê tant che riferiment la Regjon Friûl-Vignesie Julie, intant che par AutodetermiNatzione e je plui facile, par vie che ae Sardegne “reâl” i corispuint la Regjon Sardegne.

Se il Pat si presente tant che autonomist e il so profîl al somee jessi chel di une coalizion “di racuelte” e di sintesi tra posizions e esperiencis politichis diferentis, AutodetermiNatzione al palese un leam plui fuart cu la tradizion nazionalitarie sarde dai ultins cuarante agns, cuntun orientament plui a fuart progressist e indipendentist. In ducj i doi câs al ven fat indenant un refût clâr di sotanisim e “dipendentisim” e a vegnin dopradis almancul in part de comunicazion e de propagande lis lenghis propriis des dôs comunitâts.

Tes ultimis elezions politichis AutodetermiNatzione e à cjapât cuasi 20.500 preferencis al Senât (2,52% a nivel regjonâl) e 19.307 vôts ae Cjamare (2,22%) e il Pat al à vût 7.079 vôts ae Cjamare (1,02% a nivel regjonâl) e 5.015 al Senât (0,77%). L’obietîf di dutis dôs lis fuarcis politichis al è chel di vuadagnâ plui fuarce tes elezions regjonâl, che si varan chest an, ai 29 di Avrîl, in Friûl-Vignesie Julie e tal 2019 in Sardegne.

di Marco Stolfo

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +