Il Land austriac dal Tirôl al à dât fûr cualchi befel su la circolazion dai automobii su cualchidune des stradis locâls de regjon, sore dut par chês indreçadis a sud, bande de Italie. Cun chest al cîr di dâ une rispueste aes esigjencis de int, che si sint scjafoiade dal trafic, dal rumôr e dal smog, massime intai fins di setemane, cuant che i turiscj todescs si dan sot par lâ al mâr. Chescj – par solit – a varessin di doprâ la autostrade dal Prenar, che e je la arterie principâl indreçade a sud, che i mieçs pesants a strapassin in 2,4 milions ogni an! Par scjinfâ lis codis, ma soredut par sparagnâ su lis mudis de autostrade, cetancj turiscj todescs di Gjermanie a jessin de autostrade tor Innsbruk e si butin in sdrume su lis stradis normâls, ingolfant ducj chei biei paisuts che a stan dulinvie di cheste trate.
Di un pâr di setemanis incà i abitants dal Tirôl a puedin però gjoldisi lis sabidis e lis domeniis in dute recuie. No sintaran nancje chei rumôrs che nus rompin i tabars a nô furlans ogni domenie: machinis di seâ, seejerbe, trapanadôrs e vie indenant. Se intun paisut austriac un al tache un di chescj machinaris di domenie, si cjate la polizie devant intal zîr di pôcs minûts e chê no fâs sconts. Si che duncje no si pues pensâ che i abitants di chescj paisuts a podedin convivi cul davoi continui dal trafic di automobii. Juste ben il president dal Land al à deliberât di sierâ al trafic cualchi strade intes zornadis di fieste e di fin setemane, intant che intes zornadis di vore la situazion e je passabile.
Ma ce pensino di dut chest i lôr cusins de Gjermanie? Cun di fat si ur à disledrosade la anime e a àn bielzà imprometût une denunzie al tribunâl european, par vie che si sintin pidimentâts inte lôr libertât di zirâ pe Europe. Chest ancje par vie dal fat che la Europe i à scancelât la mude des autostradis, che la Gjermanie e veve introdusût nome pai forescj. Stant al ministri todesc pai traspuarts no si pues pensâ che la mude autostradâl e vegni considerade contrarie ae circolazion libare, intant che i austriacs a tressin lis stradis. Ma in chest câs – al fâs cuintri il guvier austriac – si tratarès di vuardiâ la salût de int e dal ambient! Par dîle vere la circolazion no je dal dut sierade: fin a metât Setembar, intes zornadis di fieste e intai fin setemane, vie pal dì, ancje i turiscj a puedin jessi des autostradis dal Prenar e dal Inn intal comprensori di Innsbruk, baste che a vedin di lâ intun puest precîs. Par cumò lis fuarcis dal ordin si strategnin di fâ multis e a tornin a mandâ i automobiliscj inte autostrade.
O vin fevelât dal Tirôl, ma ancje intal Solspurc a àn fate la stesse robe e cun di fat no si pues jessi de autostrade fintant che no si rive intal Carantan.
Stant a cualchi espert jurist, la Gjermanie no rivarà a puartâse fûr devant dal tribunâl european, par vie che lis stradis sieradis no son arteriis cetant impuartantis, si ben stradis locâls indreçadis viers paîs piçui, là che la lôr sigurece e la funzionalitât a àn di vê la miôr. Il stes resonament no si pues fâlu invezit pe mude in teritori gjermanic. ❚
Barbara Cinausero
