Sfuei Mensîl Furlan Indipendent
Archivi de Patrie

AUSTRIE. Vonde plastiche, tacant dai sacuts

............

Bielzà cinc agns indenant su chel che e veve planificât la Union Europeane, la Austrie e vûl meti di bande i sacuts di plastiche des buteghis e ridusi cussì la sdrume dai refudums.

Ai 5 di Dicembar stâts, il Consei dai Ministris austriac al à fate buine la improibizion di doprâ i sacuts di plastiche scomençant dal 2020, disint di vê metût jù cussì une piere miliâr intal cantin de tutele dal ambient, stramontant di fat a clâr ancje l’indreçament UE che al vâl in dì di vuê, e metintsi cun di fat al tierç puest in Europe, jenfri i stâts che a fasaran buine cheste proibizion.

Ore presint, a zirin in Austrie 400 milions sù par jù di sacuts di plastiche ogni an, dome intal setôr dal cumierç alimentâr, produsint fra 5 mil e 7 mil toneladis di refudums ad an, che dut câs a son dome une part dai refudums di plastiche tal complès.

Di chescj, i sacuts di plastiche doprâts pe spese a son chei che si sparnicin di plui ator, massime intes aghis, là che a fasin cetant dam al ambient. Dome in Austrie, ogni dì la Donau e puarte jù 100 chilos di plastiche.

Stant al ministri dal ambient Elisabeth Köstinger, la alternative miôr par fâ la spese a saressin i sacuts di tele. Ancje chei di cjarte a laressin ben, par vie che si puedin eliminâ o riciclâ miôr. Dut câs, la decision a pene cjapade e je dome che il prin pas di une strade lungje che e met la Austrie indevant in chest cjamp. Inta chest mês di Zenâr, il ministri pal ambient al inmanearà une taule taronde cui rapresentants dal cumierç par fevelâ des modalitâts par meti in vore la improibizion e lis disposizions pe dade di passaç, tignint cont ancje des iniziativis bielzà scomençadis in mût autonom e volontari dal ent austriac pal cumierç. Chest daûr de logjiche che di bande de politiche a àn di jessi regulis claris e che dut al à di jessi contindût cun armonie, tignint cont des dibisugnis di dutis lis parts in zûc. Soremarcjât, par cumò une robe e je clare: ducj a saran scoltâts, ma no si fasaran ecezions par nissun: seial che si trati di grande distribuzion, cumierç al minût o di vendite di ambulants di würstel.

Il prin pont al è chel di fissâ ce che si intint cun “sacut/borse di plastiche”, ma il guvier federâl al sta za lavorant par passâ cheste regule, stant che al vûl slargjâ la proibizion a ducj i imbalaçs di plastiche, si ben che scomençant in prin cuntune riduzion di almancul il 20-25%. In cheste maniere si gjavaressin vie 60 mil toneladis di refudums di plastiche. La Austrie, zovantsi dal semestri di presidence europeane, e à puartât la Union Europeane a discuti di une diretive su la single use plastics, che daûr di chê a vignaran improibîts ancje altris articui dopre e bute di plastiche, sicu tacis, plats, possadis, pirui par netâ lis orelis e vie indevant.

Par meti in vore chest gnûf indreçament si scomençarà propite dal marcjât setemanâl di Vilac, tacant di Zenâr, li che si podaran doprâ dome sacuts di materiâl biodegradabil.

Si domandìn inmò une volte: ma la Austrie ise propit cussì indenant cu la gjestion di chest probleme? O ai pôre che ancje in chest câs a vedin un pocje di presunzion di masse, refudantsi di cjalâ di là de palade, intal zardin dal curtilant. Cun di fat, a cjase nestre al è bielzà di cetant timp che al è obligatori di doprâ sacuts biodegradabii par comprâ pomis e verdure, e cualchi centri turistic al à za improibît lis robis dopre e bute. O fasìn avôt ancje nô, si che duncje, che chescj indreçaments a deventedin bogns par dute la Europe e salacor par dut il mont, ma soredut che a jentrin intal patrimoni etic e culturâl di ducj. E, santus!, lis balenis a saran contentis. ❚

Barbara Cinausero

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +