Lis tradizions de dì di Sant Martin

Chest articul al ven fûr cul segnacul dal corot, par memoreâ lis vitimis dal at teroristic
metût in vore a Viene inte gnot dai Muarts
I  americans se cjapin cui dindis, che a vegnin sacrificâts inte zornade de “fieste dal Ringraciament”, ancje se lôr – biadis bestiis – a àn pôc ce ringraciâ. E in Carinzie, a Sant Martin se cjapin cu lis ocjis! Cun di fat, a son 25.000 mil lis ocjis che ogni an a finissin intal plat dai carinzians in chest periodi.
Ducj o cognossìn lis liendis su la figure dal Sant de cristianitât, ma nô al plui, se o sin fortunâts, o gjoldìn i ultins lamps di un Istât intardât prime di infondâsi intai frêts dal Invier.
◆ In Carinzie, l’undis di Novembar e je une zornade une vore impuartante e no dome par vie che al scomence in mût uficiâl il carnevâl (v. n. 3/2020): si fâs fieste propit mangjant cheste plume, leade ae figure dal Sant par vie che, cuant che al fo nomenât vescul di Tours, si sarès scuindût intune stale par sghindâ la incarghe, ma al fo scuviert in graciis dal cuacâ des ocjis. A son ancje altris teoriis, come chê che e mande indaûr a une tradizion celtiche: pai Celtis, lis ocjis a fasevin di “cjans di pioris” e inte Sierade, cuant che dut il trop al vignive macelât, ancje lôr a fasevin la stesse fin. Une altre liende par spiegâ la impuartance des ocjis e conte che in ete romane chest animâl al fos simpri insiemi cul diu de vuere “Mart” e che a forin propit lis ocjis che, cuacant, a salvarin la citât di un atac dai nemîs.
◆ Ma tignìn a ments che la date e je la ultime zornade di fieste prime di un periodi lunc di dizun, che al somee a chel de Cuaresime e che al finirà a Nadâl. Intes campagnis, par prionte, propit in cheste zornade si sieravin i contrats di fit e e vignive paiade la “decime”, par solit cun prodots naturâi, juste apont – salacor – lis ocjis, mangjative che i siôrs a vevin pe miôr. Pai contadins, la dì di Sant Martin e jere cetant impuartante dal pont di viste fiscâl, par vie che e jere la fin de anade produtive e il principi dal Invier, e e jere dutun, par solit, cul marcjât anuâl. Par no scugnî nudrî i animâi, soredut ocjis, par dut l’Invier, a vevin miôr maçâlis.
◆ Une altre usance di Sant Martin, cetant cjare pai canais, e je la fogolade cui ferâi, che lôr stes a parecjin a man, che a fasin dulinvie dai paîs dutun cui gjenitôrs; po dopo, a mangjin i dolçuts tipics di pan “brioche” a forme di omenuts. Cualchi volte i canais a fasin ancje une cercje pes cjasis, par meti adun dolçuts e pomis secjis. Stant ae opinion di cualchi studiôs, cheste procession e ricuardarès la fogolade pal trasferiment dal cuarp dal Sant a Tours. Une altre spiegazion e starès intal Vanzeli. Scomençant dal secul XIII, il messâl al previôt la leture, par cheste zornade, di un pas dal Vanzeli di Luche, là che la lûs e je une vore impuartante: “Nissun al impie un lum e lu tapone cuntun vâs o lu met sot di un jet, ma lu loghe suntun cjandelîr, par che cui che al jentre al viodi la lûs” (Luche 8,16-18). Une tradizion cetant plui profane si clame “Martinloben”, usance antighe là che i viticultôrs a scomençavin a cerçâ il vin gnûf, che propit ai 11 di Novembar al tacave a madressi. In chê ocasion, tancj di lôr a vierzevin lis lôr cjanivis par invidâ ae degustazion. Ancje in dì di vuê, in chescj dîs si vierzin lis “Buschenschänken”, che a son sù par jù lis nestris frascjis. ❚