AUSTRIE. Il mont asburgjic simpri plui “fumôs”

O vin za vût fevelât dal fum intai locâi publics austriacs, ma stant aes ultimis gnovis o vin di inzornâ i nestris letôrs.
La citât di Viene, par man dai conseîrs al Ambient e ae Salût, e puarte cumò indevant un ricors costituzionâl cuintri il permès di fumâ intai esercizis publics, mandât fûr e fat bon dal Guvier federâl. La fonde dal ricors si poie sul tratament diferent che i lavorents di chest cjamp a ricevin a pet di chei di altris struturis publichis e privadis, là che la improibizion di fumâ e je bielzà in vore, che la lôr salût, cun di fat, e sarès za prudelade, a diference dai compagns dal cjamp gastronomic. Un altri pont di discussion al sarès ancje il fat che intai locâi publics a puedin jentrâ ancje i plui zovins, che par leç no puedin inmò fumâ, ma che di fat si cjamaressin di dutis lis consecuencis dal fum passîf.
Propit par chest motîf no podìn fevelâ di regulis dadis dongje cul ecuilibri miôr, cence dî che il fum passîf intai locâi al tocje ancje chês zonis tignudis buinis par chei che no fumin. Dut câs, chel che al somee anticostituzionâl al è il fat che la leç e cree une disparitât cuant che e previôt di lassâ fûr de improibizion dal fum i locâi dal setôr gastronomic. Cun di fat, chei lavorents no varessin nancje la libertât di podê sielzi, stant che a àn di passâ in chei locâi dute la zornade di lavôr. La cuistion principâl e je dut câs chê de salût dai frutins che a podaressin jentrâ tant che i grancj intes areis pai fumadôrs, ma che a son cetant plui sensibii ai efiets dal fum.
Si che duncje, il guvier austriac al à stiçât inmò i gjestôrs dai locâi publics, incolpant i Guviers di prime di jessi restâts cetant indaûr cu lis lôr sieltis su cheste cuistion, a pet di chei altris Stâts europeans. Il conseîr pal Ambient, che al à sometût il ricors, al marche in plui che, su la fonde dai scandais fats intai locâi publics che a àn areis par chei che no fumin, intal 62% dai câs a son saltadis fûr violazions gravis aes normis.
Fintremai il ministri pe Salût – grant fumadôr! – al varès dit che al è un limit ae libertât di une persone e che chest no i fasarès cuintri ae sô dipendence; e al à marcât cun di plui che in cuasi ducj chei altris Stâts europeans al è aromai normâl di no podê fumâ intai locâi publics.
Tant che o savìn, cualsisei sfuarç in chest sens al jere stât fat dibant, par vie de decision dal prin di Mai cjapade intal consei nazionâl di ÖVP e SPÖ, che e veve fat buine la pussibilitât di continuâ a fumâ intai locâi publics, si ben che sot di cualchi cundizion.
Nus lasse di clap il fat che, scomençant de stesse date, al sedi stât invezit improibît di fumâ in machine o devant dai minôrs, inosservance che dal prin di Jugn e podarà jessi cjastiade cuntune multe minime di 50 euros (come par chei che a doprin il telefonut intant che a vuidin). Dut câs, o sin inmò plui maraveâts par vie de ecezion che e lasse fûr di dut chest i taxis!
In sumis, al è alc che nol cuadre e forsit al è vêr che, tant che al dîs il titul di un libri jessût za fa cualchi an, la “Austria era un paese ordinato”, là che o marchìn “era”. ❚
Barbara Cinausero