O podìn domandâi a cualsisei di nô cuant che al scomence il carnevâl e si sintarìn dal sigûr a dî che al tache la dì daspò de Epifanie. Nuie di plui falât! Cun di fat, se la dì Sant Martin si cjatais par câs in cualchi citadine todescje (no dome austriache), no vês di pensâ di vê lis tarlupulis o di jessi su la machine dal timp invezit che suntun Flixbus! Sì, parcè che di là dal confin il Carnevâl al scomence bielzà ai 11 dal 11, aes 11.11 e 11 seconts – cun sfiladis di mascaris e schiriis di cjars alegorics – e al dure po dopo fin ae Cinise! Par todesc, cheste dade si clamile “fünfte Jahreszeit”, la cuinte stagjon, che al somee dut svoladi, che dut al è permetût ancje ai nestris vicins todescs, simpri tant seriôs. Par une volte ad an si dismolin e a ‘nt cumbinin di gruessis (ancje se nô o savìn ben che, par vêr, lis voltis a son dôs, par vie che daspò di Carnevâl a ripetin la gjonde a Pasche di Rosis inte nestris citadinis di mâr…).
La date e la ore che o vin fevelât a divegnin di une fonde storiche. Prin di dut si à di dî che culì lis usancis paianis no àn nuie a ce fâ, ancje se chest al è l’unic moment prin di Nadâl che si viodin mascaris pes stradis. La usance di Carnevâl e nas in ete cristiane, cuant che intal 354 e ven fissade la date dal Nadâl. Cun di fat, si decretà ancje un dizun di 40 dîs prime, tant che chel daspò Cuaresime, là che lis cjars, i gras animâi, i ûfs e i derivâts dal lat a jerin improibîts. Cheste preparazion al Nadâl e scomençave propit ai 11 di Novembar, che e jere la ultime zornade che si podevin fâ pacassadis prime dal dizun dal Avent. E je la zornade di Sant Martin, e ducj a san che in cheste zornade al finìs l’an agricul, daspò des vendemis e dal racuelt.
Cussì, tant che il numar 40 che al torne cetantis voltis inte simbologjie cristiane, ancje il numar 11 – che al è numar prin – nol salte fûr par câs: intant si cjate jenfri doi numars une vore simbolics inte Bibie, o ben il 10, numar dai comandaments, e il 12, numar dai apuestui. No vint puest inte simbologjie bibliche, al jere tignût tant che “numar mat” che al podeve meti in cuistion dut l’ordin sociologjic cristian. E je ancje la ultime ore, sul orloi, prime de ore “zero”, che si pensave come ore de muart, tant che il Carnevâl al è la dade prime di un lunc dizun.
Intal Votcent, la plui part des aministrazions citadinis todescjis a vevin 10 o 12 components, mai 11, che al jere invezit il numar di chei dal consei di Carnevâl. Cussì, cualchidun al dîs che la leande jenfri il Carnevâl e il numar 11 e je nassude intal 1331, cuant che al fo fondât un dai prins clubs di Carnevâl: cun di fat, chescj a àn il sproc “Ey, Lustig, Fröhlich”, che lis iniziâls ELF, a valin propit ‘undis’, par todesc!
Ma lis tradizions dal carnevâl no son dome chestis.
A Sauris, isule linguistiche gjermanofone, o ‘nt podìn preseâ cualchidune, tipiche di dut il mont alpin. O pensìn massime ae usance di zirâ pal paîs metint sù mascaris di len fatis a man e sampogns peâts te cinturie: chestis figuris a varessin di fâ pôre e di parâ vie i spirts malins dal Invier e, intal stes timp, di dismovi chei propizis de buine stagjon. Il stes intindiment lu àn lis figuris che a zirin cu lis scovis, jentrant in ogni cjase e netant vie ducj i vanzums dal Invier, par sapontâ la Vierte che e scomence a vignî fûr. ❚