✽✽ La zone cuvierte di glaçârs in Austrie si è smiezade tacant de metât dal Votcent
De crisi economiche no si fevele tant. Tal timp di grande coalizion nol sucêt tant, ancje se il miliardari Stronach al minace di bati intes prossimis elezions i partîts vieris, ma chest nol semee masse probabil.
Ce che al preocupe dopo cheste stagjon masse frede, e al moment masse cjalde, al è il cambiament climatic. In Austrie, tant che in dute la regjon alpine, chest procès al va indenant svelt, cun velocitât dople in confront dal svilup globâl.
Il clime in Austrie si pues dividi in dôs zonis: a soreli bonât e a nord dulà che al domine il clime oceanic influençât dispès di aiars umits, e a soreli jevât cuntun inflùs de zone panoniche plui continentâl, cun mancul ploie, Istâts cjalts e Inviers crûts. Di fat, il clime regjonâl al è caraterizât de topografie alpine. Dispès o vin diferencis notevulis di clime fra distancis curtis: cul aument de altitudin, ducj i gjenars di clime fin a chel subartic e polâr.
✽✽ La regjon alpine si scjalde une vore plui svelte
Dal inizi dal Nûfcent, la temperadure medie globâl e je lade sù di cirche un grât centigradi. In Austrie però, fin a doi grâts. La regjon alpine si scjalde duncje une vore plui svelte. I impats efetîfs in Austrie a son evidents za cumò: su lis monts plui altis, la distribuzion dal permafrost si ridûs, e di consecuence si destabilize il teren cretôs. Il materiâl detritic destabilizât al è za deventât un pericul grâf che al à procurât l’an passât un disastri naturâl in Stirie.
Prospetivis neris ancje pal turisim invernâl: il declin des precipitazions di nêf aes altitudins disot dai 1.000 metris sul nivel dal mâr al è za clarementri misurabil. Par esempli, a Kitzbühel (790 m) in Tirôl, tai agns ’60 al à neveât il dopli che dai agns 90 in ca.
✽✽ Il record negatîf lu à il glaçâr carinzian »Pasterze« da pît dal Grossglockner
La zone cuvierte di glaçârs in Austrie si è smiezade tacant de metât dal Votcent, passant di cirche 1.011 km ² (1850) a 470 km ² (1998).
I ultins risultâts des analisis glaceologjichis che si cjatin tal rapuart dal Alpenverein (http://www.alpenverein.at), tal mês di Avrîl dal 2013 a confermin che il 98% dai glaçârs al è daûr a ritirâsi. La pierdite di lungjece in medie e je di 17,4 metris. Il record negatîf al è dal glaçâr “Pasterze”, da pît dal Grossglockner, che si è ridusût di scuasit 100 metris. Te storie de sô misurazion, tacant dal 1879, la lenghe dal glaçâr no si è mai disfate tant svelte. Cu la sô lungjece di cirche 9 km, al è ancje il plui grant glaçâr des Alps Orientâls, vâl a dî in dut il teritori dal Brenner fin a Viene. Dal 1856, la aree glaçade di plui di 30 km ² e je smagride di scuasit la metât. Il non de atrazion turistiche carinziane al ven, come la plui part de toponomastiche in Carinzie, dal sloven “pastirica”, vâl a dî “zone pastorâl”.
AL SUCÊT ANCJE —————————————–
✽✽ Grande celebrazion: 20 agns dal ricognossiment dai roms
Scuasit 20 agns indaûr i roms a son stâts uficialmentri ricognossûts tant che grup etnic in Austrie. Te ocasion de zornade internazionâl dai Rom e Sinti, si à celebrât chest inovâl tal parlament di Viene, in presince di numerôs rapresentants des associazions roms e de politiche austriache.
Il president austriac Heinz Fischer, la presidente dal Parlament Barbara Prammer e la ministre de Culture Claudia Schmied, ducj a son vignûts a celebrâ l’inovâl dal ricognossiment dai Rom. In di plui, il president dal parlament dal Burgenland Gerhard Steier al à rimarcât che propit il Burgenland al davuelç un rûl centrâl pai Roms austriacs.
“I Roms a son tant che chei altris grups etnics di grande impuartance pe lôr identitât culturâl e linguistiche. La diviersitât e la presince a son no dome rilevants pal Burgenland, ma ancje part de carateristiche uniche di cheste regjon.
Ancjemò escludûts de leç di tutele des minorancis linguistichis dal 1976, a rivarin adore a vê il ricognossiment daspò la iniziative de Associazion Culturâl dai Roms austriacs dome 17 agns dopo, sot il cancelîr di chê volte Franz Vranitzky. La figure clâf di dut chest procès al jere e al è ancjemò il fondadôr de Associazion Rudolf Sarközy, nassût intal cjamp di concentrament di Lackenbach tal 1944. La comunitât dai Roms dal Burgenland e je vuê ben integrade ancje in graciis dal lavôr di Sarközi. Cumò a vivin tal Burgenland 2.000-2.500 Roms. Soredut la gjenerazion dai zovins e à acès a une istruzion miôr, diviers di lôr a àn ancje completât i studis universitaris. Magari cussì no, cu la vite moderne integrade si sta però pierdint la lôr lenghe: tes fameis zovins si fevele plui o mancul dome par todesc.
✒ Janez Erat
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +