Sfuei Mensîl Furlan Indipendent
Archivi de Patrie

AUSTRIE. Dulà lino in Istât? Vacancis in Austrie a nivel record!

............

Un su cuatri al reste in Austrie, Grecie, mancul 30%. Cul vierzisi de stagjon des vacancis scolastichis – a partî de fin di Jugn – e tache ancje la stagjon turistiche. Come che al sucêt ancje di altris bandis, chei che a àn fruts in etât di scuele a puedin viazâ dome in cheste stagjon.
I prins che a sierin l’an e ancje la lôr cariere scolastiche a son i diplomâts dal liceu che a fiestezin daûr l’esempli american cuntun viaç cun dute la classe, clamât in Austrie “Maturareise”. I americans lu clamin “spring break” e a van viers destinazions li che no je restrizion tal ûs dal alcul, tant che Gjiamaiche o Messic. I austriacs a fasin compagn su la riviere turche: tai decenis indaûr si visitavin lis citâts e si fasevin viaçs di culture, invezit vuê si cîr il divertiment inte masse anonime. Il leader di marcjât e il plui popolâr di chescj events di masse al è il “Summersplash”, ogni an intun dai clubs vacancis su la riviere turche.
Un mega business e logjistiche cun precision militâr_ 4000 diplomâts a celebrin un all inclusive party. Inmò cui doi concorents “X-Jam” e “Mission to Beach” a son plui di 20.000 fruts, plui de metât di ducj i diplomâts de classe 2012 che a àn sielzût il concet dal viaç coletîf disvilupât tredis agns indaûr di Dietmar Tunkel. Un mega business, in gran part ancje parcè che il viaç al è il lûc ideâl pai sponsors e pai media.
I VIP dal mont dai media e il sport si tirin daûr i bêçs dai sponsors_ Ospit speciâl al è stât par 100.000 € par un set complet di karaoke la zovine stele svedese DJ Avicii. Presints ancje i leader dai media, val a dî i gjornâi plui grancj: “Heute”, “Kurier” e la television di stât ORF.
Si cjatin simpri dapardut i prodots dai sponsors, publicâts ancje su milions di imagjins su Facebook.  Alore ducj a vuadagnin une vore di bêçs e i fruts si divertissin spindint cirche 850 € par une setemane.
Il comant logjistic dal “viaç des massis”_ La logjistiche di chest event e je pardabon stressante. La operazion di “viaç des massis di fruts” e funzione daûr des cuintis cun precision militâr tant che un orloi svuizar. Se no, nol sarès pussibil movi, controlâ e puartâ indenant massis di cheste fate. Dome il cambiament di ogni sabide al è une imprese logjistiche: dentri di pocjis oris dute la popolazion dai turiscj scuelârs e torne in Austrie e chê gnove e rive tal istès timp cun traspuarts di pueste di dute la Austrie.
E ce fasino chei altris?
“Parcè cirî la contentece lontan se ce che al è di plui biel si cjate ca di nô, in Austrie?” Lant daûr di chest sproc, simpri plui austriacs a progjetin lis lôr feriis. Chest si pues lei te ultime analisi dal turisim austriac dal IFT (Istitût de ricercje dal timp libar e turisim): cirche 1,2 milions di austriacs a fasin lis lôr vacancis intes regjons turistichis di Stirie, Tirôl e Carinzie, cuntun aument di plui di un tierç.
• Plui austriacs a fasin feriis rispiet al an precedent.
• La Austrie e gjolt plui di simpri di une grande popolaritât.
• Italie, Cravuazie e Turchie a son lis destinazions di vacancis plui popolârs.
La Gjermanie e lasse pe prime volte indaûr la Grecie come destinazion.

COMPUARTAMENT dal an turistic 2011

• In confront ai ultins agns, al salte fûr che simpri plui viazadôrs a sielzin vacancis curtis che a durin dome doi o trê dîs.
• Lis personis mancul zovinis e chês cuntun nivel bas di istruzion a viazin di mancul.
Daûr la opinion dal diretôr dal istitût IFT professôr Peter Zellmann, i austriacs no cognossin – almancul par chel che al rivuarde lis lôr vacancis – nissune crisi economiche: “In câs di conferme di ce che si spiete, la Istât dal 2012 e sarà di record. La industrie dal turisim domestic e gjolt di une grande popolaritât cence precedents.”
Al jude a incressi il boom di vacancis in cjase ancje la situazion di crisi di cierts paîs tant che la Grecie. Ma ancje Spagne e Italie a pierdin une vore come destinazion trative. Dome il trê par cent dai austriacs al reste fedêl ae Grecie. I dâts atuâl a indichin un câl des prenotazions pe Grecie di un 30%. “Lis menacis di faliment a fasin pôre. No vuelin vê problemis”, al dîs l’autôr de ultime analisi Zellmann.
Ancje l’interès pe Italie – che e reste la destinazion tradizionalmentri plui popolâr tal forest dai austriacs – si è sbassât.
La Austrie, e soredut la regjon ator dai grancj lâts e des monts de Carinzie, e cjape profit de situazion de crisi dal euro; chei altris vincidôrs a son la Cravuazie e la Turchie.
La “sorprese assolude” – cuntune cressite che e je passade dal un fin al 7% – e je chest an la Gjermanie. Pe prime volte a son plui chei che vuelin fâ feriis li che su la cueste greghe.
In struc, i turiscj austriacs a cirin stabilitât, la Bavarie e il Mâr Baltic a ufrissin propit chel. A van in feriis 4,6 milions di austriacs, vâl a dî il 61 par cent de popolazion totâl: un numar plui alt che mai. ■
JANEZ ERAT

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +