AUSTRIE. Diretôrs des scuelis superiôrs a vuelin la lauree in lenghe turche

Dâ ai students la oportunitât di aprofondî lis propriis competencis linguistichis
Cuant che il president turc Erdog˘an tal Jugn di chest an al à visitade Viene par promovi la sô rielezion, i gjornâi si son metûts a discuti i problemis de integrazion dai turcs inte societât austriache. Un grum di lôr a vivin chi za di plui di 40-50 agns e a son deventât citadins de Austrie. E sarès ore di introdusi ancje la lenghe turche tal sisteme scolastic austriac che fin cumò nol proviôt l’insegnament dal turc: cussì a pensin diviers politics, soredut de çampe, ma ancje une part dal partît popolâr ÖVP. Il president Erdog˘an, cognossût pal so interès pe diaspore turche, al à domandât za tal 2008 di meti sù scuelis e universitâts turchis in Gjermanie. Lis ideis dal president turc a plasin ai turcs austriacs che a àn ricevût Erdog˘an a Viene tant che une popstar. Pal gjornâl “Standard”, la sô popolaritât nus mostre che il progjet de integrazion al è falît.
Daûr un sondaç de organizazion »SOS«, il 72% dai diretôrs des scuelis superiôrs al è a pro de lenghe turche tant che sogjet di insegnament e il 76% al vûl viodi la lenghe turche ancje tes universitâts. A mancjin però insegnants di lenghe turche e fin cumò nol è nissun programe pe formazion sistematiche di chei insegnants.
Dâ un incentîf pe istruzion superiôr
La plui part dai diretôrs si spiete, cul ampliament dal numar des lenghis forestis, un efiet positîf su la gramatiche e sul vocabolari dai zovins. Gran part dai turcs e dopre la lenghe mari dome a nivel de comunicazion di ogni dì. Une buine paronance de lenghe mari e je un prerecuisît pal aprendiment di altris lenghis. Une lauree turche e sarès ancje un incentîf ae istruzion superiôr.
Aprofondî lis propriis competencis linguistichis
Pal puartevôs de organizazion SOS Alexander Pollak, i risultâts dal scandai “a son une vore plui clârs di chel che si spietavin”. Soredut tes scuelis cuntune alte percentuâl di students di lenghe turche, si vûl promovi a plen lis potenzialitâts dai zovins. Si trate soredut di dâ ai students la oportunitât di aprofondî lis propriis competencis linguistichis, vâl a dî di puartâ lis cognossincis de lenghe mari a un nivel superiôr.
6.300 students a fevelin par turc
A diference di altris lenghis dai imigrâts tant che il rus, il polac o il serp-cravuat – che in Austrie si clame uficialmentri bosniac-croat-serp o, in curt, dome «BKS» -, la lenghe turche e ven insegnade dome in forme sperimentâl intun gjinasi a Viene sul Abendgymnasium Henriettenplatz.
Daûr «Statistik Austria», un totâl di 6.300 students tes classis des scuelis superiôrs a doprin il todesc e ancje il turc. Magari cussì no, lis dôs lenghis minoritariis plui feveladis – il serp-cravuat e il turc – a vegnin consideradis ancjemò tant che lenghis cuntun valôr plui bas. Za di agns no si môf nuie par chel che al rivuarde la formazion dai insegnants te Universitât Pedagogjiche di Graz , e cence insegnants preparâts une istruzion no sarà pussibile. Chel altri probleme al è che fin cumò no son stâts elaborâts materiâi didatics.
Dut chest al ven criticât ancje de economie austriache: la Turchie e je un partner comerciâl impuartant, e e je grande la domande di lavoradôrs cualificâts che a fevelin in maniere fluente in turc e che a puedin ancje esprimisi ben in forme scrite.
Ma la pôre dai partîts di diestre e je masse grande. I argoments dal FPÖ a son assurts; e dîs Alev Korun, dal partît dai Verts, nassude e cressude in Turchie: “A disin simpri: ‘Prin a scuegnin imparâ il todesc.’ Cheste però je une robe fûr dal vade: «Se chescj students no vessin imparât il todesc ,no saressin mai rivâts intune scuele superiôr.» ❚
Janez Erat