Dibatit sui oraris dai locâi: viertiduris o restrizions pai amants dal “Dopo schi”?

Al somee che pai carinzians – ma no dome par lôr, chest an e vegni fûr une biele novitât che e tocje i locâi che a son clamâts “dopo schi”. Cun di fat, il ministri austriac pal turisim al à dât part che a saran i sindics a stabilî i oraris di viertidure e di sieradure di chescj locâi. Al covente dut câs dî che in Carinzie tantis areis schiistichis a son disvilupadis su plui comuns o distrets e in cualchi câs a scjavacin ancje i confins nazionâi. Par chest motîf, la associazion dai comuns austriacs e à za pandût la sô opinion contrarie a cheste idee e ancje in Carinzie no àn scuindût i lôr dubis. Tant par dî une, cjapìn il Gerlitzen, che tancj furlans a cognossin, che al è logât su trê comuns: Arriach, Treffen e Bodensdorf. I sindics de zone a proponin di cjatâsi insiemi, prime dal Invier, e di clamâ intune i gjestôrs di ducj i locâi interessâts par cjatâ une soluzion uniche, par vie che no laressin ben regolaments e oraris diferents. Cun di plui, a contindin che l’oblic di chestis regolamentazions al sedi une responsabilitât dal guvier centrâl o di chel regjonâl.
◆ Sul Pramuel le pensin un pôc diferente, par vie che no ducj a refudin lis propuestis dal guvier. L’impuartant – a disin – al è che lis regulis a vadin a pro des esigjencis dai ospits e dai gjestôrs dai ricets alpins. Cetancj ospits dai hotel de zone, cun di fat, a bacigaressin vulintîr i ricets nome daspò de cene, e alore sierâju aes 10.00 di sere al sarès masse adore. Stant però che sul tart l’alcul le fasarès di paron, sierâju a miezegnot al podarès lâ avonde ben. I gjestôrs dai ricets che a son tacâts des pistis no àn interès par chestis cuistions, par vie che a sierin aes cinc sot sere, cuant che a sierin ancje i implants. A fasin ecezion, par altri, ricets come chei sul Katschberg, al confin jenfri Carinzie e Salon, là che si spere intune viertidure che si slungje par cori cu lis slitutis e cui schîs vie pe gnot.
◆ Bisugne dut câs fâ in mût che la int no cori di ca e di là pes monts a cirî i ricets che a son vierts plui a lunc, ancje par vie che in chescj timps di pandemie, chest nol zovarès. Si à bielzà viodût, cun di fat, che tai locâi fûr man, ancje chei che a varessin di sierâ aes cinc sot sere, a continuavin a balâ fin tal cûr de gnot, a front di chei des valadis, là che lis regulis a vignivin simpri rispietadis. In sumis, i prins a varessin di jessi tratâts tant che locâi noturnis, là che i seconts a saressin tignûts in cont di ristorants o di tratoriis. Par fâ chest, i comuns a varessin di dâ un jutori par classificâ ducj i locâi, lassant dut câs al guvier centrâl o aes regjons di dâ lis regulis. ❚