Sfuei Mensîl Furlan Indipendent
Archivi de Patrie

AUSTRIE. Compromès al puest de riforme necessarie de scuele

............

Dopo che i studis PISA a àn mostrât risultâts preocupants, si à tacât l’an passât a discuti suntune gnove riforme scolastiche pes scuelis mediis.  Il moviment a pro des riformis al à domandât un gjenar di scuele comun par ducj i students tra i 10 e i 14 agns di etât. Par chê riforme al mancje il consens dai partîts di guvier però almancul il dibatit al à movût alc.  Pe prime volte de introduzion dal Politecnic di plui di 50 agns fa, la Austrie e propon un gnûf gjenar di scuele. Il Consei nazionâl al à decidût a largje maiorance di introdusi la ‘Gnove Scuele Medie’, vâl a dî par todesc ‘Neue Mittelschule’ (NMS) tant che scuele regolâr, dal inizi di chest an scolastic.
Fin al 2018/19, il gnûf gjenar di scuele al rimplaçarà dutis lis scuelis secondariis obligatoriis (‘Hauptschule’) che dispès, soredut  tes citâts, a ufrissin un nivel masse bas di istruzion. Il principi fondamentâl de gnove NMS al è la diferenziazion interne des materiis principâls, ven a stâi todesc, matematiche e inglês (o une altre lenghe foreste). E ven fate une distinzion tra cognossince di base e chê gjenerâl. La cognossince gjenerâl suficiente e da la pussibilitât di passâ ae AHS superiôr, ven a dî al gjinasi, e po dopo di podê lâ indenant ae Universitât. Altris elements a son misuris educativis tant che la formazion in grups temporanis, il cussì clamât ‘team di insegnament’, cun doi insegnants. Par chescj progjets a son disponibii 240 milions di euros al an.
La gnove scuele – Une piere miliâr de riforme scolastiche necessarie_ Cun 264 gnûfs lûcs tal cors dal an scolastic 2012/13, o vin in Austrie un totâl di 698 gnovis scuelis secondariis, che a ufrissin lis miôr oportunitâts ancje par chei arlêfs plui debui.  La gnove medie e je stade progjetade tant che scuele dal futûr cuntun gnûf orientament viers lis domandis modernis. Atenzion individuâl e promozion des prestazions a son i pilastris di cheste scuele comun pai fruts dai  10 ai 14 agns di etât, cussì nus spieghe il ministeri responsabil. Il guvier direzût de grande coalizion ÖVP-SPÖ si mostre content di jessi rivât a chest compromès.
E ce nus puartial di gnûf la gnove scuele tal cjamp de istruzion bilengâl?_ La scuele medie e je ancje vantazose pai fruts de minorance slovene, stant che la formazion in lenghe slovene no je plui un teme complementâr, ma cumò pe prime volte e je stade integrade tal programe scolastic regolâr. In precedence, i students che a vevin sielzude ancje la lenghe slovene a vevin plui oris. Buine ancje la gnove che al va indenant il trend positîf dai ultins agns in Carinzie cun plui oris di istruzion in lenghe di minorance e plui arlêfs che a sielzin la istruzion bilengâl. ■
JANEZ ERAT

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +