Sfuei Mensîl Furlan Indipendent
Archivi de Patrie

AUSTRIE. Carinzie e Friûl: caraterizâts de lôr situazion di frontiere

............

La Carinzie e fo dilunc de sô storie une des regjons mancul svilupadis. La provincie plui meridionâl de Austrie e je caraterizade de sô situazion di frontiere cu la Slovenie e Italie, e de assence di un impuartant centri urban. No cate une economie relativementri diviersificade la regjon si cjate daspò un câl massiç tal setôr dal turisim intune crisi economiche. Fuarts auments a vegnin regjistrâts te industrie chimiche, te costruzion di machinis e metai e soredut te industrie eletriche. La agriculture e reste in Carinzie ancjemò une vore impuartante, dut câs dome un cuart dai agricultôrs a lavorin a timp plen. La parcentuâl di aziendis agriculis di montagne e je cuasi il 50%. I prodots principâi a son cjar bovine e lat. La Carinzie e je une des plui impuartantis localitâts di vacance in Austrie. E mancje une promozion dal turisim di dut l’an e la modernizazion dal turisim invernâl.
Une altre debolece de economie e je la mancjance di un centri economic cun ducj i vantaçs di une zone di aglomerazion che al podedi agjî tant che nuclei di cressite.
Se o fevelìn di economie in Carinzie o scugnìn nomenâ ancje la crisi atuâl de seste bancje plui grande, la Hypo Alpe Adrie cu la sede a Clanfurt. Par evitâ une crisi di dut il setôr bancjari austriac la bancje e ven nazionalizade dal stât austriac.
Export in cressite_ Positive la economie di espuartazion, che e je in plene espansion. Intal periodi dal 1998 al 2007 lis esportazions a vevin un plus di 135,1%. La Carinzie si cjate cussì pe cressite dal export al tierç puest dopo de Stirie e dal Tirôl. Lis esportazions a àn passât pe prime volte tal 2007 la cifre di 5 miliarts di Euro. Lis principâls industriis a son il turisim, la eletroniche, inzegnerie e agriculture; i setôrs di espuartazion plui impuartants la lavorazion dai metai e la industrie chimiche.
I partner comerciâi principâi de Carinzie a son la Gjermanie e, al secont puest, la Italie. Pe prime volte a àn espuartât robis di un valôr sore di un miliart di euro in Italie.
Simpri plui impuartants i partners comerciâi te Sud-Est Europe. In Ongjarie a puartin za prodots par un valôr di 221 milions di euros, mintri in Slovenie 196 milions, une vore in aument i paîs tant che la Cechie, Romanie o Cravuazie.
Gnûf inviestiments in Carinzie a dispiet de crisi_ Il belanç pal 2009: 32 progjets realizâts e 930 puescj di vore screâts. Impresis de Italie, Russie e Gjermanie si son stabilidis l’an passât. Tra di lôr ancje diviersis societâts de Italie tant che par esempli la imprese “Petraglas” che e da lavôr a 40 dipendents tal parc industriâl a St. Veit.
Un leam storic cu la Val Cjanâl_ Fin a la prime vuere mondiâl la Val Cjanâl e jere part de Carinzie mintri che a Jevât Bela Pecˇ/Fusinis/Weissenfels part de Carniole slovene, dal 1923 invezit a son jentradis te provincie di Udin. Cun acuardis bilaterâi di Mussolini cun Hitler i slovens e todescj a forin clamâts a sielzi: deventâ citadins todescs, o restâ inte val. La plui part dai todescj si trasferirin in Carinzie e Stirie, i slovens tant che agricultôrs, plui stanziâi, a restarin.
Daspò la vuere, al contrari dal Sud Tirôl, dome un pocje di int e je tornade.
Vuê scuasit ogni carinzian o sloven de regjon carniole a jerin za te Val Cjanâl, almancul a Tarvis, il motîf al jere scuasit fûr par fûr il marcjât inviât 55 agns indaûr di comerciants napulitans. Te ete de globalizazion i marcjâts di frontiere a àn pierdût il lôr sflandôr. Pal sindic di Tarvis e ancje pai politics carinzians, prime e dopo di Haider, i rapuarts a restin impuartants: dopo dut propit il sindic Renato Carlantoni, di mari austriache e nassût a Vilac, al è un simbul pe relazion Vilac-Tarvis. Cussì nuie strani che la costruzion dal gnûf marcjât di Tarvis e je stade realizade de imprese Buchacher di Hermagor, un progjet cuntun totâl di 4,5 milions di euro. Il governadôr carinzian Gerhard Dörfler al è dacuardi, insieme cui fondadôrs de associazion “Italie-Carinzie”, il president Paolo Quercia (il zinar di Haider) e Paolo Rondo Brovetto de Universitât di Clanfurt, che al è necessari lâ indevant cu la ereditât dal governadôr Haider continuant cu lis relazions tra lis regjons de Carinzie, Friûl-Vignesie Julie e dal Venit.
Cu la realizazion progjetade de Euroregjon, si spiete une significative potenzialitât di cressite, soredut grazie ae sô posizion gjeografiche.
JANEZ ERAT

Stin dongje ae Patrie

Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +