Benzà ancje a Sanremo une cjançon e vinç nome se e cjacare di BÊÇS BÊÇS BÊÇS. E alore o fevelarìn di bêçs ancje nô!
Cuant che intun comun piçul al siere l’ultin sportel di bancje, e par chel nol reste plui nancje un bancomat par tirâ fûr uns cuatri euros, la int e scomence a vê la lune stuarte. Se e va di chê bande, no si piert nome un lûc di scambi sociâl, ma si riscje che ancje cualchi alc di soreplui al scjampi vie viers i comuns dal dulintor. Se i abitants a scuegnin spostâsi intun altri comun par gjavâ fûr il contant, alore a fasaran culà ancje lis lôr spesis, e a decidaran di restâ di chês bandis ancje par gustâ intun ristorant o par bevi il cafè.
Intai ultins agns in Austrie e je lade simpri piês tai servizis di cheste fate, a dispiet dal fat che il numar dai bancomat al sedi lât in incressite: intal ultin deceni il numar dai bancomat al è cressût di un cuint, tant che si fâs cont che indi sedin dibot dîs par ogni mil abitants; ben di plui che in Gjermanie e in Svuizare. Ma chest al console pôc i comuns là che chescj imprescj a mancjin. Par justâ la cuistion la associazion dai Comuns e à fat une convenzion cun Mastercard, là che a saran lis buteghis piçulis e i ambients di ristorazion che pal avignî a daran fûr i bêçs licuits, cul pat che si fasedi une compre o une consumazion paiadis cul bancomat. Ben clâr che chest servizi no si pues vêlu cuntune cjarte di credit. Fin in dì di vuê cheste pussibilitât e restave jenfri i confins des grandis cjadenis di negozis alimentârs, che dut câs no si cjatilis ta ducj i comuns.
Dopo di vê metût in vore un progjet di prove intes ostariis di doi piçui comuns dal Tirôl, cumò il servizi al cjaparà pît ta dute la Austrie. Par vê il numar plui alt pussibil di postazions la associazion dai Comuns e domande la poie ai sindics di sù par jù 2.000 localitâts e la associazion des Cjamaris di Cumierç e clamarà adun ducj i buteghîrs e i ristoradôrs. Il president dal cumierç dal setôr tessil al sburtarà a chest pro 37.000 piçulis buteghis, che a patissin par vie des venditis on-line: plui bêçs contants a zirin e mancul si compre in internet. Stant che a son 60.000 ativitâts leadis ae gastronomie, dal sigûr si podarà fa cetant par dâ fûr bêçs licuits. I marcjadants e i ostîrs no varan coscj in plui, se bielzà a àn la pussibilitât di paiâ cul bancomat. Chei altris a varan cundizions di favôr. Al somee che Mastercard al rivedi a meti adun almancul mil comerciants dentri di chest an, ancje in puescj che prime no vevin sportei bancomat. Par cumò la jeve no podarà jessi di plui di 20 euros e sul scontrin la spese di consumazion o di compre e sarà marcade in mût disseparât.
Il president de associazion dai Comuns al sa che il contant al è une vore impuartant pai austriacs e, stant che la gjestion di un sportel bancomat e je sù par jù di 7.500 euros par an, a coventin 25.000 prelêfs par stâ dentri. Inalore, pûr di vê un sportel, tancj Comuns si cjamin il caric dai coscj intai confronts des bancjis, slizerint cussì la pression simpri plui fuarte pe int viers di lôr. Midiant di chest progjet i Comuns a podaran sparagnâ cetant su chestis spesis di gjestion.
Pai utents i vantaçs a son clârs, stant che no varan plui di movisi par cirî un sportel e vê bêçs svelts. Ma salacor in cheste medaie al è un aspiet mancul lusint. Dal sigûr la cuistion e larà a bon pro dai piçui esercizis, ma saraie cussì ancje pes sachetis de int? Cuissà che intune ete là che il consumisim le fâs di paron, dut chest nol sedi un rimpin par spindi di plui e cence masse control?
O spietìn propite curiôs i prins risultâts di chest progjet. ❚
Barbara Cinausero