ATUALITÂT – Zornade dai Dirits: une ecezion dome nestre?

Tal calendari a ‘nd è diviersis zornadis dedicadis a dirits specifics, pe plui part istituzionalizadis de ONU, ma chê che ju ten ducj adun, ven a dî la Zornade dai Dirits Umans, e cole ai 10 di Dicembar. Par chel che si sa, invezit, no je nissune dì che e celebri ducj i dirits, ma cuntune declinazion locâl. Inte liste ONU, la Zornade internazionâl plui dongje de ZFD e je chê dedicade ae lenghe mari (International Mother Language Day), che si celebre ai 21 di Fevrâr.
LIS NAZIONS CENCE STÂT_ Massime framieç des nazions cence stât, invezit, a son lis fiestis nazionâls a cjapâ sù dispès la ande di zornadis di rivendicazion dai dirits di chê comunitât. Al è il câs dai catalans che a celebrin la lôr fieste nazionâl ai 11 di Setembar (par ricuardâ une sconfite patide intal 1714, ma daspò di une lungje resistence). Baste lei ce che al è scrit suntun sît dedicât propit a cheste zornade: “Ogni 11 di Setembar cetancj catalans e catalanis o lin dilunc a manifestâ pes stradis par domandâ che a sedin ricognossûts i nestris dirits nazionâi e plui autoguvier”.
IN CONCOMITANCE_ Par tantis comunitâts, lis fiestis nazionâls a colin te zornade dal sant protetôr – sant Andree in Scozie (30 di Novembar), sant David in Gales (1 di Març), sant Olaf intes Fær Øer (29 di Jugn), e v.i. – ma no mancjin popui, e no dome tra chei minorizâts, che a ricuardin ats di riviel: baste pensâ ai 14 di Lui dai francês! In ciertis comunitâts a ‘nd è ancje zornadis che a àn une nature plui militante e che si zontin ae fieste nazionâl: al è il câs dal Gudari Eguna (Zornade dal combatent basc) che al cole ai 27 di Setembar e che al ven celebrât massime de çampe indipendentiste basche.
CARLI PUP