ATUALITÂT – Vescul al sgarfe inmò

A distance di 2 agns al torne su lis frecuencis di Onde Furlane il documentari «on the road» su la emigrazion furlane: «Sgarfefurlans».
Il progjet di Loris Vescovo, che tal 2007 al jere lât in Australie, Gnove Zelande, Thailandie e Cine, al jere lât in onde tal 2008 e al veve vût ancje un ricognossiment di bande de Unesco che lu veve inserît te liste dai progjets dal an internazionâl des lenghis, te sezion dal «multilinguisim e des rêts internazionâls».
Cun lunis ai 4 di Otubar, des 11 di buinore, la trasmission e je tornade a partî su lis frecuencis di Radio Onde Furlane, di dulà che Loris Vescovo, cu la colaborazion dal videomaker Marco D’Agostini e la organizazion di Pauli Cantarut, al conte lis esperiencis dai emigrants furlans che tal ultin secul a son partîts dal Friûl par lâ te Europe dal Est: 18 zornadis e sîsmil chilometris su lis stradis de Slovachie (Bratislave), de Ucraine (Svidnik, a Leopoli e Kiev), de Romanie (tra Tulcea, Greci, Bucarest, Pitesti, Campulung, Petrosani) sierant in Ongjarie (a Budapest).
«O vin regjistrât 25 intervistis» al precise il cjantautôr-condutôr «cun storiis pardabon difarentis une di chê altre: o ricuardi dome chê di Anita Elda Battigelli, nassude a Maian 95 agns indaûr, fie di muradôrs rivade in Romanie che e veve 2 agns e che e fevele inmò par furlan o chê di Elettra Virgili, invezit, zovine laureade di Udin e emigrade di pôc a Bucarest par cirî chê fortune che la Italie dai co.co.co no i garantìs».
Storiis di operaris, boscadôrs, inzegnîrs, comerciants che dilunc dal «secul curt» a son partîts de Patrie, passant pe fin dal imperi asburgjic, dôs vueris mondiâls, la fin dal comunisim… e cualchidun al è ancje tornât indaûr.
«Tes lôr storiis» al continue Loris Vescovo «o vin cjatât i problemis tipics de int che e scuen partî: il rapuart cu la gnove culture, i problemis di lenghe e integrazion, cualchidun al à vût sucès, ma al è capitât ancje che cualchidun nol vedi fortune».
Vescovo si ferme ancje su lis gnovis gjenerazions «A son une vore curiôs e tancj a doprin Internet: il grant interès però spes si compagne cu la delusion parcè che no simpri a rivin a cjatâ rispuestis di bande des istituzions e la «lôr domande di Friûl» no à simpri chê rispueste che si spietaressin. I zovins dissendents no si contentin di une cerimonie o di une cene: a àn dibisugne di contats, informazions e rapuarts concrets cu lis lôr lidrîs furlanis».
Il progjet al è realizât cul contribût di Aster Cultura – Noi Cultura e il finanziament dal Servizi Identitâts linguistichis e coregionâi tal forest de Regjon Friûl – Vignesie Julie.
Christian Romanini