ATUALITÂT – Une Clape «di Palaç»

Dulà sono lâts a finîle i ex emigrants cu la lôr auliche sute e cualchi volte rivoluzionarie? No dal sigûr te Clape – Friûl dal Mont, almancul cjalant la ultime “Lettera aperta al Dr. Renzo Tondo” disponibile sul sît www.clape.it.
Cuntun lengaç tipichementri politichês, la Clape e dîs dut e il contrari di dut, de glocalizazion, al “Commonwealth talian” dai salts, onescj e lavoradôrs, passant clarementri pal stuzighin e gjeneric potenziament de «influence furlane in ogni bande dal mont”, soluzion par dutis lis crisis…
La cueste une volte movimentiste dal Ente Friuli nel Mondo e domande al President «di valutâ in maniere plui serene i progjets presentâts, di controlâ i risultâts e i beneficis otignûts”: ma cuâi vantaçs àno dât ai ex emigrants i viaçs in Argjentine – che e sta ai nestris furlans che a cirin ispirazion tant che il Tibet ai alternatîfs -, la svolte folk-editoriâl rigorosementri par talian e il simil patronât “Sportel Informe Furlans”, che si ‘nt sa propit pôc? Dut chest al ricuarde la ativitât des tantis Associazions de Emigrazion in Regjon, centrâls di spese alimentadis massime cun fonts publics, al servizi di interès ristrets.
Dai ex emigrants si son cuasi ducj dismenteâts, salacor parcè che “semplicementri furlans” e che no àn bisugne di une vôs che ju diferenzii par fuarce di chei altris paisans… E pûr lôr, se a vessin voie, a varessin tant di dî e intune maniere sclete, dal sigûr lontane dal «Palaç».
(REDAZION)