Il Liet International al è la rassegne europeane plui impuartante di cjançons in lenghe minoritarie organizade zaromai dal 2002. Il leam jenfri Friûl e Frisie si è rinfuarcît simpri di plui, e la colaborazion e je cussì salde che si fevele di organizâ une finâl dal Festival a Udin tal 2011.
Impegnâts in prime linie par rivâ a chest obietîf a son il Progjet Suns e Radio Onde Furlane. Il percors al è ancjemò daûr a fâsi e par capî a ce pont che o sin o vin fevelât cun Leo Virgili, che i sta daûr par cont di Radio Onde Furlane, e cun Onno Falkena che, in plui di jessi un dai paris dal Liet International, al lavore te television frisone tant che dirigjent dal setôr multimediâl, e al è un otim cognossidôr di musiche in lenghis di minorance.
LA SITUAZION FIN CUMò_ Leo Virgili nus à spiegât cuale che e je la situazion. «O vin domandât ae Agjenzie Regjonâl pe Lenghe Furlane, di deventâ l’Ent a cjâf dal progjet SUNS che al met dongje cetancj ents locâi ma ancje associazions e sogjets privâts di dut il Friûl. O sin in spiete di une rispueste uficiâl che e varès di rivâ in curt.» Se la ARLeF e decidès di poiâ il progjet, si podarès organizâ pal mês di Setembar une semifinâl dal Liet Festival achì a Udin, pas fondamentâl par podê vê la finâl vere e proprie. La idee e je chê di publicâ un bant di concors dulà che a puedin partecipâ i artiscj che a doprin lis lenghis di minorance di Austrie, Italie, Slovenie e Svuizare. Une jurie internazionâl e sielzarà lis vot cjançons che a cjaparan part ae selezion finâl che si tignarà a Udin, il prin e il secont classificât a passaran di dirit al Liet International, che si davuelzarà ai 31 di Otubar a Leeuwarden, in Frisie.
ORGANIZADÔR_ A Onno Falkena invezit, i vin domandât sedi une opinion su la sene musicâl furlane, sedi cuâi vantaçs che e puartarès al Friûl une finâl dal Liet International, e lis rispuestis che nus à dât a son pardabon interessantis.
Il prin grup furlan che Onno al à cognossût e scoltât a son stâts i Mitili FLK, in France. «Mi son plasûts une vore: vivarôs, origjinâi, une misture interessante jenfri musiche tradizionâl e contemporanie e, soredut, une vore brâfs dal vîf». Ma si vise di ducj i grups di chenti che a àn partecipât al Liet Festival dal 2002, an de prime edizion, al 2008: Prorastar, Kosovni Odpadki, Arbe Garbe e, naturalmentri, i Carnicats che a àn puartât la marilenghe fintremai al circul polâr. Soredut i Arbe Garbe a àn lassât il segn te television svedese e te citât di Östersund.
FURLANS SIMPRI PRESINTS_ La jurie e à sielzût ogni an un grup furlan, propit in gracie de cualitât e de origjinalitât de lôr musiche. Ancje intai ultins agns, cundut che il numar di cjançons di scoltâ e di selezionâ al è cressût une vore, i furlans a son simpri stâts presints. «Al è pardabon un plasê lavorâ cui furlans» al dîs Onno, «a àn capît dal principi parcè che o vin organizât il Festival, che dongje dal idealisim al è un mieç par valorizâ lis professionalitât e par promovi in maniere positive e moderne lis lenghis e lis culturis mancul pandudis. Po dopo i furlans a son simpri stâts presints e «gjenerôs» ancje tai afterparty…».
CULTURE VIERTE_ Par Onno Falkena la musiche furlane e je interessante parcè che e sint de influence di altris realtâts. Chest al prove che si trate di une culture vierte: dongje a valorizâ lis nestris peculiaritâts, o vin gust di cognossi e di miscliçâsi cu la musiche di chei altris. Un amôr pe patrie, pal so patrimoni artistic e culturâl, e tal stes timp, la volontât di cressi e di sperimentâ robis gnovis. Cheste cumbinazion interessante, Onno le cjate soredut tes produzions di Loris Vescovo e Lino Straulino, ma ancje tal lavôr di R.esistence in Dub, Arbe Garbe e Radio Zastava e, passant dai grups aes etichetis, te ativitât de Nota Records, che e prodûs artiscj di nivel internazionâl.
Ancje in confront cu la sene europeane, la musiche furlane e je dinamiche, si ben che ogni minorance e à une situazion difarente. Par esempli i Sámi dal nord de Scandinavie, cundut che a son dome 50.000, a àn une vore di artiscj, ancje di cualitât, cuntun bon sucès ancje fûr dal lôr paîs. Al contrari, in Scozie la situazion e je cetant plui dificile, lis cjançons a son dome chês tradizionâls, no je une produzion contemporanie. Onno al crôt che ae nestre musiche i mancji dome un artist che al vei un sucès internazionâl, un tic come che al è sucedût tai Paîs Bas al grup frison Twarres, che al è rivât prin te top 50 olandese, devant di grups come i U2. Pe imagjine de lenghe jenfri i zovins chest al vâl plui di cetantis altris azions di tutele.
PROMOZION_ Dut câs, il Liet Festival nol fâs ben dome ae musiche ma al zove ancje ae promozion dal paîs che lu ospite. «Fin cumò la manifestazion si è davuelte simpri tal nord Europe, e je ore che e rivedi a sud des Alps» – al spere Onno – «sei parcè che la sene musicâl e je une vore interessante, sei par promovi la citât di Udin come centri di cheste realtât. Cun di plui, il Festival al è un mieç pardabon eficaç par promovi un teritori: te prime edizion a jerin la BBC World e la CNN a fâ reportage e servizis. Une grande visibilitât pe citât di Ljouwert/Leeuwarden e pe Frisie, sore che pe lenghe e pe culture locâls».
Une ocasion che Udin e il Friûl no àn di lassâsi scjampâ. www.myspace.com/lietinternational
Federica Angeli
Gnovis / Presentazion dal libri di Erika Adami “Feminis furlanis fuartis”
Redazion
La Patrie dal Friûl e presente il libri “Feminis furlanis fuartis”. Storiis di feminis furlanis dal dì di vuê, pôc o par nuie cognossudis, diferentis par etât, divignince, esperiencis formativis e professionâls. Lis lee la fuarce che a esprimin tal cirî di realizâsi cun tignince, tai cjamps plui svariâts. Cun braùre pes lidrîs e tal […] lei di plui +
Event / Stin dongje ae Patrie – fotos de serade
Redazion
Joibe ai 30 di Novembar al Teatro San Giorgio – Udin (Borc di Graçan) si è tignude la seconde edizion de manifestazion “Stin dongje ae Patrie” che e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +