Sfuei Mensîl Furlan Indipendent
Archivi de Patrie

ATUALITÂT – Sperance par Sapade/Plozen

............

Un motîf di sperance in plui par Sapade di passâ dal Venit al Friûl. Je à dade la gnove che e je rivade de Cjamare dai deputâts ai 6 di Mai stâts, cu la aprovazion a largje maiorance la propueste di leç pal passaç di siet Comuns des Marchis ae Emilie Romagne, te provincie di Rimini. Si trate di siet paîs de Alte Val Marecchia: Casteldelci, Maiolo, Novafeltria, Pennabilli, Sant’Agata Feltria, San Leo e Talamello, che tal Dicembar dal 2006, midiant di referendum, a vevin dit di sì al «trasferiment» cul 83,91% dai consens. Cumò la propueste di leç e varà di passâ ancje al Senât, ma i referendaris a son avonde fiduciôs.
La gnove e je stade plausade ancje a Sapade, par vie che se la leç e deventàs definitive e splanarès la strade ancje ai sapadins che tal Març dal 2008, cuntun referendum a àn dit di volê stâ sot de bandiere dal Friûl cul 95% di «sì» e cuntune partecipazion al vôt dal 75,31%.
DIFICOLTÂTS_ Par che la volontât popolâr e sei definitivementri rispietade, però, e covente ancje par lôr une leç dal Stât e il vie libare des dôs regjons interessadis, ven a stâi il Friûl-Vignesie Julie (dulà che no varessin di jessi problemis) e il Venit (dulà che la cuestion no si rive a glotile). Su la facende al pese ancje il fat che pai siet Comuns de Val Marecchia si trate di un passaç tra dôs regjons a statût ordenari; par Sapade, invezit, si tratarès di passâ di une ordenarie a une speciâl.
Dut câs, il senatôr dal Pdl Ferruccio Saro bielzà ai 16 di Otubar dal 2008 al à presentât il disen di leç par tacâ il viaç parlamentâr, ma fintremai in dì di vuê la discussion no je scomençade te comission Afârs costituzionâi, li che il document al è stât assegnât. Cun di plui, prin di rivâ al vôt de Aule, il test al varà di passâ ancje pes comissions Belanç e Afârs regjonâi.
SPERANCIS_»Il vôt de Cjamare al dimostre che il passaç si pues fâ» a àn comentât a bote cjalde di Sapade Riccardo Breusa e Danilo Quinz, rispetivementri president e puartevôs dal Comitât referendari. «O vin simpri dit – a àn rimarcât – che par nô al sarà dificil, anzit dificilon, ma no impussibil. O vin dit che o sin ancje pronts a rispietâ une decision contrarie al nestri passaç in Friûl, ma o domandìn al Parlament che nus dei une rispueste il plui in curt pussibil».
La propueste di leç aprovade ae Cjamare, a disin a Sapade, e dimostre ce che tal paîs dolomitan si à simpri dit: e esist une leç dal Stât che e proviôt la pussibilitât di lâ di un regjon a di chê altre; duncje la robe e je pussibil e la strade, cul poc dal referendum, e pues jessi chê de leç di iniziative parlamentâr, no dome governative.
Ma dopo la gjonde pai «amîs» de Val Marecchia, Sapade ce spietie? «Che il disen di leç che nus rivuarde al sei discutût in Comission – al à rispuindût Quinz – e che il Parlament al domandi il parê a lis dôs regjons interessadis. O crôt e o speri che ancje tes istituzions dal Venit e sedi daûr a madurî  une gnove cussience sul argoment».
Antonella Lanfrit

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +