ATUALITÂT – Un zoiel clamât Cjargnel

Al è un piçul miracul, unic in Italie, un campionât di balon che si zuie dome tai mês estîfs, intun teritori limitât, cu la ambizion dal autoguvier. O fevelìn dal «Campionât Cjargnel», un dai motîfs di svant pai sportîfs de Cjargne, dal Cjanâl dal Fier, de Val Cjanâl, dal Sapadin e dal Glemonàs. Desenis di scuadris, centenârs di praticants e di spetatôrs cun particolaritâts unichis. Des scuadris cui zuiadôrs cuasi ducj cul stes cognon, a une specie di «azionariât popolâr» dai cjâfs di famee di un paîs, a son il spinâl di un torneu dividût in Prime, Seconde e Tierce categorie.
Dal prin campionât – 1950/’51, vinçût de Pro Tolmezzo – a vuê, il fenomen al è cressût metint in mostre cualchi particolaritât: par esempli, i centris plui popolâts a son rivâts dome da râr a cjapâ il titul massim. A vinci a son cuasi simpri i centris minôrs. I paisuts di 100-200 abitants che a crodin pardabon te lôr scuadre, tant che le amin in maniere morbose e a invistissin fonts pe lôr «creature». L’ultin deceni al à viodût il strapodê di Illegiana, Cedarchis, Real-Imponzo/Cadunea (cul stadi clamât di ducj il «Maracanà» de Cjargne), par finî cul Campagnola/Gemona, che chest an al à mancjât pal secont viaç la dispate pal scudet, dopo chê dal 2004, cuintri i paularins de Velox.
Cemût che al fasi a sorevivi un torneu di chestis dimensions, si sta un moment a dîlu: tante passion, volontariât e un minim contribût di bande dai sponsors locâi. Un torneu di 1e categorie al pues costâ 25 mil euros ad an.
Ma al è cui che se puarte fûr pontant dome sui incàs de domenie; e je ancjemò la usance  dal «sagristan», cul incjariât che ti ven a domandâ bêçs. E a di chescj personaçs unics e folcloristics, no tu puedis dîur di no.
Il «Cjargnel» al è cussì sintût che i mass media locâi lu supuartin cun ce tante enfasi. L’unic difiet al è che nol ufrìs plui talents aes seriis maiôrs: i ultins Cleto Polonia e massime Maurizio Ganz, il bomber tarvisian rivât a zuiâ in Inter e Milan. Par un valit ricambi gjenerazionâl, cussì, la F.i.g.c. e à inviade la regule dai «fûr di cuote»: l’oblic di fâ zuiâ un pâr di zovins sot i vincj agns, che a àn la oportunitât di zuiâ in prime scuadre.
Dino Temil