ATUALITÂT. Un toc di storie ferade

La linie ferade Cjasarse-Pinçan, cumò dismetude, e à rapresentât un piçul toc di storie dal Friûl, stant che, oltri che a jessi stade protagoniste des dôs vueris mondiâls, e je stade ancje element di disvilup pai teritoris li che e passave, oltri che a colegâju cul rest dal mont (al baste pensâ ai tancj emigrâts che a tacavin il lôr viaç propit cun chel tren). Le à realizade il Ream di Italie par dâi cuintri ai trafics comerciâi che a levin sù dal puart austriac di Triest viers la Europe. La linie Cjasarse-Spilimberc e fo screade ai 12 di Zenâr dal 1893, cun gjonde de popolazion e vignint doprade par traspuartâ marcjanziis e par esigjencis militârs. Ai 16 di Zenâr dal 1912 la trate e fo finide rivant fint a Pinçan. E fo une vore impuartante pes vueris: i austriacs, judâts dai todescs, a costruirin adiriture la stazion di Cjasarse Nord (po eliminade) impuartant pont di racuelte di fuarcis militârs che a levin su la Plâf. La stazion e jere in localitât Valcunsat li che al rivà in visite a lis sôs trupis, pôcs mês prime de fin de vuere, l’imperadôr Carli di Asburc. Te seconde vuere mondiâl i todescs a doprarin la linie, intant che i aleâts a bombardarin Cjasarse. Tal secont dopovuere la linie e à vût la sô ete miôr cun sîs corsis pal traspuart di int e un tren par marcjanziis in dì tra Cjasarse e Glemone.
Ma tai agns 60 la situazion e mudà. La cressite dal traspuart su gome e la motorizazion de popolazion a mandarin in crisi lis liniis feradis plui piçulis. Tal 1967 la linie Cjasarse-Pinçan e fo sierade al trafic de int (sostituide cun autocorsis), e a continuà fin al 1987 chê di marcjanziis par trê voltis par setemane. E po e fo bandonade dal dut.
Redazion