ATUALITÂT – Trente agns dal Premi leterari Sant Simon

La Aministrazion comunâl di Codroip e fiesteze tal Otubar di chest an i trente agns dal Premi San Simon, prestigjôs concors leterari in lenghe furlane dedicât ae memorie dal inzegnîr Agnul M. Pittana, cognossût tant che Agnul Di Spere.
Nassût tal 1979 cul intindiment di prudelâ l’insiorament de leterature furlane midiant la publicazion di tescj di cualitât alte sedi tai contignûts sedi te forme, il premi si presente ancje chest an cu la volontât di fâ cressi la culture e la lenghe furlanis. Il bant di concors, vignût fûr ancjemò a Fevrâr, al è disponibil li de Biblioteche Civiche Don Gilberto Pressacco di Codroip e al da dutis lis indicazion par presentâ une opare inedite che e à di jessi un romanç, une conte lungje o une racuelte di contis a teme libar, ma miôr ancjemò se e indaghe lis difarentis musis de realtât furlane dai ultins cincuante agns. I tescj, scrits cu la grafie uficiâl daûr de leç regjonâl 15/96, a àn di jessi luncs no mancul di sessante cartelis e a àn di rivâ li de Biblioteche Civiche di Codroip dentri des siet sore sere di sabide ai 12 di Setembar dal 2009. La jurie che e scrutinarà lis oparis e je formade di Aldo Colonnello, Franco Marchetta, Carlo Tolazzi, Mario Turello, Giacomo Vit, dal Sindic Vittorino Boem, cun funzion di president onorari, e ancje dal segretari Giorgio De Tina. Al autôr de opare che la jurie e sielzarà, i larà un premi di mil e cinccent euros e une plache di arint. La Aministrazion comunâl, daûr de propueste de jurie, e podarà decidi di publicâ il lavôr premiât. La proclamazion dal vincidôr e di chei che a àn meretade une segnalazion, si le fasarà inte serade di miercus ai 28 di Otubar, dì di Sant Simon. Par informazions: tel. 0432.908198.
REDAZION