Sfuei Mensîl Furlan Indipendent
Archivi de Patrie

ATUALITÂT – Riformis dai Ents locâi ancje in mont

............

In chest periodi, in Regjon – dopo dai provediments dal Guvier li che si propon di unî i Comuns sot dai mil abitants e di gjavâ lis Provinciis sot i 300.000 – si sta lavorant su chestis riformis dai ents locâi. O vin cussì volût sintî la opinion di un sindic, cjargnel, inte sô vieste di aministradôr elet in maniere direte de int.
“Dal sigûr no je la grande riforme strategjiche che ducj si spietavin – al conte Fabio D’Andrea –. La mê impression e je che si è rivâts a une propueste di leç ingredeade e za superade in partence: la peraule di ordin e je cambiâ dut par no cambiâ nuie. L’obietîf al someave chel di imponi la fusion dai piçui comuns di mont, cjapâts di smire cuasi tant che i colpevui principâi di dutis lis straçariis di cheste Regjon. Ancje se ducj a san che i unics Ents virtuôs a son propit i comuns, dulà che i sindics, lis zontis e i conseîrs comunâi a costin pôc. I comuns, e in particolâr i sindics, a son i sogjets plui dongje a la int, a son i gnûfs partigjans di une contese cence scrupui. A esistin za lis associazions dai servizis di valade che a tachin a funzionâ benon, razionalizant coscj e competencis. La riforme proponude no rapresente une novitât, par nuie. Il probleme di cheste Regjon e je la Regjon stesse, il so aparât tecnic aministratîf, i ents di secont grât, i consorzis, lis aziendis e vie indevant: orghins che spes no coventin, che a crein dome confusion e conflits di competence. Bisugnarès partî cu la sopression e l’azerament di dute cheste robe: alore sì che si sparagnaressin milions e milions di euros. Ma il vêr probleme che nissun al vûl frontâ (soredut la Regjon) al è chel di eliminâ i tancj laçs burocratics che a blochin ogni iniziative. Si cjacare di crisi economiche, di mancjance di lavôr, di disocupazion, però se si sblocassin lis operis publichis za finanziadis (e fermis par problemis burocratics) e tornarès a partî dute la economie furlane. Ma nissun al vûl tocjâ i ‘burocrats’ che a cjapin stipendis di fâ voltâ i voi e a justifichin il lôr jessi cun provediments ridicui. Par no cjacarâ des Provinciis: ents dal dut inutii che a coventin a tornâ a distribuî sul teritori, a voltis cun sieltis dal dut clientelârs, ce che le Regjon e podarès fâ in maniere direte cence nissun passaç di mieç (a voltis un contribût di mil euros dât a un comun, al coste doi mil euros di spesis burocratichis). O si met man radicâl al sisteme – dant plui podê e autonomie gjestionâl ai sindics – se di no ogni riforme e nassarà za çuete e destinade a falî.
SOLUZIONS_ Come che o ai za dit, se no si met man intal aparât burocratic de Regjon, nissune riforme e pues jessi crodibile. Creâ comuns di valade al podarès jessi, a gno judizi, une sintesi plausibile, se insedade intun cuadri di riforme plui ampli che al proviodi la cancelazion des Proviciis, la sopression di ducj i ents intermediaris inutii, che a àn rason di esisti dome par sistemâ intai diviers conseis di aministrazion i amîs e i amîs dai amîs cun prebendis altononis. A varessin di restâ dome la regjon e i comuns. Cu la eliminazion de burocrazie si sveltiressin ducj i procès autorizatîfs e si darès un gnûf sburt ae economie. Nol sarès mâl ancje regjonalizâ la Sorintendence, altri organisim che dispès al mostre parês che dîur incomprensibii al è pôc. Però, par fâ chest al vûl coragjo e bisugne jessi pronts a molâ la poltrone e a rinunciâ a “bogns pagnuts”. Il coragjo, ancje chel di metisi in zûc, al è ce che al mancje a chei che a governin e che a fasin lis leçs in Regjon.”
Marta Vezzi

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +