ATUALITÂT. RAI e lenghe furlane

E je stade firmade ancje pal 2010 la convenzion jenfri Regjon e sede RAI dal Friûl-Vignesie Julie, che e permet la realizazion e la metude in onde di programs in marilenghe sedi in radio che in tv. Daspò di un an sperimentâl, al è stât decidût di dâ continuitât al progjet partît tal 2008.
La decision e je stade chê di confermâ la trasmission radio di atualitât Vuê o fevelìn di…, che e va in onde dôs voltis in dì, aes 12.20 e aes 15.15, tai moments di massime scolte, e che e à une buine audience. 200 mil euros par 47 setemanis di metude in onde.
Dongje di chest, la RAI e à autoprodusût trê gnovis pontadis di 25 minûts ognidune de Pimpa, il dissen animât di Altan che al à simpri tant sucès jenfri grancj e piçui. Trê storiis mai viodudis nancje par talian, une biele esclusive cun cualchi novitât rispiet al passât: l’ûs des varietâts. Come simpri, lis trasmissions pe television a van in onde la domenie matine aes 9.45, un orari pardabon pôc fortunât.
SPIETANT ROME_ In spiete che a Rome si decidin a garantî i dirits des minorancis te radiotelevision publiche, chest al è ce che si rive a realizâ cu lis fuarcis regjonâls.
Ma a la int, come che a mostrin i scandais, i programs par furlan i plasin e alore al sarès ben che a fossin a disposizion di ducj cun mancul fature. E je ore che i sîts Internet ju metin a disposizion tant che podcast, come che al sucêt pe plui part des trasmissions, soredut radio. Al pâr che cheste e sei la strade e che, in curt, si ju cjatarà sul sît de Regjon.
AL RIVE IL DIGJITÂL_ Ma cheste no je la uniche novitât. Ancje chenti, tor de fin dal an, si passarà al digjitâl, un moment fondamentâl, une oportunitât che lis lenghis minorizadis no puedin pierdi. L’obietîf al è chel che la rêt 3bis e deventi rete 4, di mût che si podedi viodile in dute la regjon, e di disfrutâ chest spazi par cressi il numar di programs tes trê lenghis tuteladis.
Tal ultin, la Regjon e lavore ancje par che part de cuote des oris di trasmission radio di competence de sede RAI locâl – che cumò a son par talian – e puedi sei fate par furlan. Il contat cul Dipartiment de editorie al è stât cjapât, si reste in spiete di une rispueste. Al è clâr che il probleme plui grant al reste chel dai coscj.
Dilunc dai agns, RAI e Regjon a àn lavorât in sintonie, cun grant impegn, e i risultâts a son stâts bogns. Daûr dal Diretôr Collini, la RAI e à capît la impuartance di afermâ il dirit dai furlans di doprâ la lôr lenghe te television publiche. La sperance e je che chest dirit al vegni metût in vore.
Federica Angeli