ATUALITÂT. Contrat di servizi. Il timp al è scjadût

Tal mês di Avrîl al sarà firmât il gnûf contrat di servizi 2010-2012 jenfri il Ministeri des Comunicazions e la RAI. Un document cetant impuartant pe metude in vore de Leç 482 che e dîs a clâr che il contrat al à di tignî cont sei dal nivel minim di tutele par ogni minorance, sei dal fat che lis sedis RAI locâls à àn di ocupâsi de programazion in lenghe minoritarie.
La Leç e à zaromai 10 agns, il colôr dai guviers al è cambiât, ma in ducj i contrats di servizi firmâts fin cumò nol è mai stât scrit nuie di concret su chest argoment. A la piês si è fat riferiment ae pussibilitât che lis sedis locâls a trasmetin programs in lenghe minoritarie paiâts dai ents locâi, o ben ce che al sucêt za e, ven a stâi, programs che i utents a pain doi viaçs.
Tai agns passâts, lis pressions politichis e dai comitâts a àn sconzurât il risi che tal contrat no fossin nancje nomenâts la Leç 482 e i dirits des minorancis. La Regjon e à mandât tal mês di Fevrâr stât une letare ae Comission parlamentâr di Vigjilance, par che e dei il so parê sul document, e par che lis indicazions par realizâ i programs previodûts de Leç 482 a sein plui precisis. Une richieste al Guvier par podê vê une autonomie de RAI regjonâl compagne a chê de Provincie di Bolzan, e je stade fate ancjemò in Dicembar dal President de Regjon Tondo e dal Consei Ballaman.
La rispueste no je ancjemò rivade e la bataie e somee lungje. Forsi scrivi nol baste par fâ capî cualis che a son lis esigjencis dal popul furlan.
Federica Angeli