ATUALITÂT – Pordenonelegge.it 2009, cent mil personis in citât

Ancjemò sucès di public par pordenonelegge.it, la fieste dai libris cui autôrs, che dai 16 ai 20 di Setembar e à puartât a Pordenon 100 mil personis pe sô decime edizion. Tancj ancje i autôrs furlans che a àn fevelât in cheste edizion: di Carlo Sgorlon, Tullio Avoledo, Mauro Corona e Pierluigi Cappello (un «poker» di penis simpri presint a Pordenon) fin a Toni Capuozzo, vice diretôr dal Tg5 che, pûr di jessi al festival, al è lât e tornât di Rome tra il 17 e il 18 di Setembar in pôc plui di 12 oris (al veve di condusi il speciâl di Terra su Canale 5 dopo dal atentât in Afghanistan cuintri i nestris soldâts). E, si à di dî, chest an la manifestazion si è dispierdude di plui tal teritori, presentant tantis produzions di cjasis editoriâls furlanis e no (ancje dal vicin Venit e de Vignesie Julie) e incuntris cun autôrs locâi. Il programe dedicât al teritori si clamave «Da vicin», e al à viodût ancje il prin fotoromanç zâl di Pordenon, ven a stâi «Male sit tibi», dai pordenonês Piergiorgio Grizzo, Antonio Ros, Paolo Ciot, Francesco Guazzoni e Piervincenzo Di Terlizzi (Associazion La Voce). Te opare ancje Paolone Vidoz e i atletis de nazionâl di atletiche de Gjamaiche che si stavin alenant a Lignan chest istât. Tancj piçui tassei di un caleidoscopi leterari par furlan, che i mancje però ancjemò il toc principâl, ven a stâi un autôr in marilenghe «spindibil» ancje dal pont di viste comerciâl. E sarès ore di vê un autôr furlan plui «pop»: Pasolini al jere un grant, ma pai agns 2000 la promozion di une lenghe e passe ancje pe comercializazion. In chel sens, pordenonelegge.it al podarà jessi in futûr, cuant che chest fantomatic autôr al vignarà fûr, la vetrine pe sô celebrazion. O almancul, e jo mi contentarès, di un Camilleri dal Tiliment che, scrivint par talian, al sarès cussì brâf di furlanizâ la lenghe di Dante, creant atenzion viers la nestre tiere. Isal domandâ masse?
Davide Francescutti