ATUALITÂT – Pittaro cuintri dal furlan tal Censiment

Pal President di “Ente Friuli nel Mondo” lis lenghis minoritariis no coventin
Intant che si preparave a fâ lis valîs pe cunvigne dai zovins furlans in Nord Americhe che si è davuelt in Canadà, ai 12 di Otubar une notizie de agjenzie stampe Adrkronos e à vût come protagonist, magari cussì no, Pieri Pittaro, president di “Ente Friuli nel Mondo”.
Denant des protestis dal Comitadu Pro Limba Sarda che si lamentave pe mancjance in Sardegne di modui pal censiment in sart e in catalan a Alguer e di rilevadôrs che a feveledin chês lenghis minoritariis (il stes probleme al è stât denunciât di plui vôs ancje in Friûl pe nestre lenghe) Pittaro al à declarât «Ce che al è masse al va parsore: figurìnsi se il Stât al à di spindi un frac di bêçs pai rilevatôrs in lenghe minoritarie» e no content, tra il divertît e il rabiât,
al à continuât «E je une robe che no sta in pîts, a ce coventino
i tradutôrs cuant che lis minorancis a fevelin talian miôr di me,
sino fûr di cjâf?».
No à tardât la repliche di Mario Carboni, coordenadôr dal Comitadu Pro Limba Sarda «Pietro Pittaro, oltri che a jessi un comentadôr volgâr, si met in linie cui “puartadôrs sans di fassisim linguistic” inmò une vore numerôs te societât taliane».
Evidentementri, pal President di “Ente Friuli nel Mondo”, che al varès di rapresentâ il Friûl e la furlanetât tal mont, la lenghe dal Stât e à di jessi dome il talian, lassant lis lenghis minoritariis (comprindût il furlan) sieradis dome in cjase… E pûr, rivât in Canadà, la prime robe che a àn domandât i zovins dissendents dai nestris emigrants al è stât propit di podê imparâ la lenghe furlane…
I varano fat gambiâ idee?
Par furtune che tal 2010 Pieri Pittaro al declarave che al sarès stât “un president di passaç” e si sarès dimetût dopo di une prime “fase di transizion”: che e sedi rivade la ore par Pittaro di tornâ a “fâ lis valîs”, cheste volte no pe enesime trasfierte ator pai Fogolârs, ma par lassâ Borc dal Sâl in maniere definitive? Il biliet (Udin-Codroip, cence tornâ) jal regalìn noaltris!
REDAZION