ATUALITÂT – «Pericolo Etnonazionalismo». Ma indulà?

Il slargjament de buse dal ozon? Il petroli che al à asfaltât il Golf dal Messic? La menace nucleâr»? No, il pericul – anzit, «il pericolo» – tal mont, in Europe, ma soredut tal Stât talian, e massime chi di nô, al è un altri e si clame «Etnonazionalismo».
CE «RAZE» DI RESONAMENTS!_ L’intindiment, ancjemò plui che cun «Localismo» (cuistion za frontade su La Patrie dal Friûl dal mês passât), al è chel di calcolâ tant che alc di brut, di trist, di pericolôs dut ce che al à a ce fâ cuntun teritori, la sô int, la sô dimension linguistiche, culturâl, identitarie, e la volontât di difindi dirits e interès e di intervignî in maniere direte tes decision che a integnin chê tiere e cui che al vîf lenti. Cun di fat, se cun «Localismo» si à chê di marcâ il riferiment a di un spazi precîs, un lûc, specific e piçul, dulà che si varès di «sierâsi», «cuintri dut e cuintri ducj», cun «Etnonazionalismo» la atenzion e je pontade su la dimension dal ethnos, intindude sedi cun riferiment a lenghe e culture – cuntune coretece teoriche ancje se cuntun prejudizi negatîf, stant che a saressin lenghe e culture di une tribù di salvadis peâts a strent a chescj totems identitaris – cun rivuart presumude e esaltade dimension «raziâl». Cun dut che lis razis no esistin e la etnie no à nuie a ce viodi ni cul sanc ni cul colôr de piel.
REVIVAL ETNIC E ETNONAZIONALISIM IN EUROPE_ La espression che par furlan si pues voltâle cun etnonazionalisim e à une cierte difusion tal lengaç des siencis sociâls tacant dai agns Setante dal secul passât. Si riferìs a corints di pinsîr politic e a formis di organizazion che a àn chê de autodeterminazion des cussì clamadis «nazions cence stât» inte Europe di soreli a mont, ma no à nissune conotazion negative viers di chestis ideis e di chescj moviments. Anzit, tancj studiôs a metin in evidence in tiermins positîfs propit la dinamicitât teoriche e la pluralitât di obietîfs strategjics dal etnonazionalisim e dai moviments nazionalitaris rispiet al nazionalisim classic burît fûr dilunc vie dal Votcent. In particolâr, nol è plui il cult assolût de creazion di un propri Stât nazionâl, i obietîs di autodeterminazion e autoguvier a vegnin declinâts in plui formis, cuntune atenzion specifiche pe dimension europeane e mondiâl dai dirits e des relazions, e e je une cussience fuarte de necessitât di superâ dôs formis di alienazion, che si fasin fuarce une su chê altre: la prime e rivuarde il plan culturâl, linguistic, ambientâl e identitari e la seconde chel economic, politic e sociâl.
Un cuadri di chestis ideis si pues cjatâlu in tancj documents uficiâi de Aleance libare europeane, la famee politiche che in Europe e ten dentri la massime part des fuarcis politichis nazionalitariis e che, pûr cun pôcs eurodeputâts, tal Parlament di Strasburc e manten in tantis ocasions lis posizions plui viertis e positivis in materie di dirits fondamentâi, di disvilup sostignibil, di dialic interculturâl, di citadinance europeane. Ducj temis declinabii e dispès declinâts ancje chenti par un «Friûl plui furlan».
TRAGJEDIIS E MATEÇS DAL VETERONAZIONALISIM TALIAN_ Il «Pericolo Etnonazionalismo» al è stât tirât fûr chi di nô cun fuarce particolâr propit intant dal dibatiment su la gnove leç di tutele de lenghe furlane e daspò de sô aprovazion in Consei regjonâl. Il paradòs al è che daûr di chestis preocupazions si cjatin propit chês ideis e chei prejudizis che a divegnin dal nazionalisim dal Votcent: chel che al à vût parturît lis disgraziis plui grandis dal secul passât e che in dì di vuê si palese ancjemò cu la esaltazion dal monolinguisim e di altris caratars etnics (propit cussì) blindâts, considerâts unics e unitaris, e cu la pôre de diviersitât, il dut magari platât daûr di gnûf particolarisims strumentâi. Cun di plui, il cult de «unità nazionale» al ven proponût inte forme de difese de «unità regionale». Par dîle cun Karl Marx: la prime volte e je une tragjedie, la seconde un mateç.
Marco Stolfo