Cuant che si fevele di libris e progjets di culture cun Orazio Cantiello, fondadôr de cjase editore l’Omino Rosso, si reste stranîts, par la tante passion che al met tai siei progjets. La sô e je une piçule realtât, dal dut origjinâl, jenfri il panorame des cjasis editoris, ma tal stes timp e je leade al teritori tant di publicâ libris (uniche realtât di Pordenon citât) in furlan koinè ma ancje in varietâts specifichis da lis vâls de provincie. Ogni publicazion e ven presentade cuntun piçul aveniment-event che a smire soredut a dâ lustri ai autôrs cence però jessi un spot par vendi.
Cemût mai la idee di screâ une gnove cjase editore?
Cuant che o jeri piçul o volevi deventâ avocat, ma cressint mi soi inacuart di vê une cussience…
Il merit al è stât dai libris che o ai let e chi, intai agns, o ai imparât a vê a cjâr. O crôt di jessi un predestinât…
Di dulà vegnie le idee dal non Omino Rosso?
Cualchi an indaûr o cirivi un non che al podès meti in struc la mê personalitât: chei che mi cognossin a san che o soi un “fint-sclagn” e che mi plasin cetant i pomodoros e lis cjariesis. E po o crôt ancjemò a Sant nicolau, l’Om Ros par ecelence.
Presentinus la cjase editore L’Omino Rosso (www.ominorosso.it)?
O fasìn biei libris, cualchi volte dibessôi cualchi volte in colaborazion cun ents, aziendis e associazions. O vin sîs golainis che a spaziin da la leteradure pai frutus (il nestri element di ponte…) a la art, da la sagjistiche al lis vuidis. Insome, un pôc di dut, ma simpri cui pîts par tiere. Progjets dimensionâts a la nestre realtât e al nestri teritori. In cheste otiche nus plâs indreçâso ancje ai plui grancj cun titui di interès sociâl che a àn tocjât temis come la diaspore, il degrât ambientâl o lis storiis mai contadis.
Cual isal il pont di fuarce de tô cjase editore?
Jessi origjnâi al coste tante fadie e bêçs, ma al da tantis sodisfazions. Intal grant panorame de editorie nazionâl e locâl, o cirìn di metisi in mostre cun propuestis coloradis e cetant legris che a coinvolzin cuasi simpri autôrs di cjase nestre.
Cuâi sono i titui che o vês publicât
in marilenghe?
I libris in marilenghe par cumò a son trê, ma dome un al è dut in lenghe. Il prin si intitule “Se o fos un grant”, un libri ilustrât par canais che al à vût un gran sucès di critiche e un biel riscuintri di vendite. Il secont al è “Vito d’Asio e la Val D’Arzin”, un libri fotografic cun tescj par furlan, talian e inglês, lât vendût in pôc timp e vuê in ristampe. Il tierç al è “Pavea un’estât, la luna tal codâr” in furlan asin cun cjadincis dal puest e cun traduzion par talian; chest ultin libri lu vin presentât intai dîs passâts cuntun spetacul di suns e peraulis pardabon di fuarte emozion.
Une vore di titui a son leâts a strent
cul teritori e a son adiriture scrits
in tipologjiis di furlan locâl. Parcè?
La grande part de nestre produzion e je leade al nestri teritori (Friûl-Vignesie Julie e zonis di confin cul Venit), e propit par chest, diviers libris a son cun tescj par furlan. In chest sens, po, o vin cjatât aministrazions comunâls che si son dimostradis un partner atent e disponibil a valorizâ la culture dal lûc.
Pal doman intendêso continuâ a publicâ libris in marilenghe?
Sigûr. Lis sfidis mi son simpri plasudis e chê dal publicâ par furlan (intune zone come chê di Pordenon citât) e je plui inmagant di altris. Dal pont di viste comerciâl o vin devant un public esigjent, che al sa preseâ la cualitât e che tal stes timp al snobe lis iniziativis editoriâls che no curin intai detâis il complicât e variegât mont leât a la lenghe da la nestre regjon.
Vêso progjets in cors di opare?
Par sielte aziendâl lis nestris novitâts a jessin dutis di Jugn in denant. Ven a stâi che si prepìn a la publicazion di cinc libris: doi par canais, doi par fruts e un sul sport. I titui a vegnaran presentâts a Pordenonelegge.it (19-21 di Setembar) e te setemanis daspò in diviers incuintris. I titui che la comission di Pordenonelegge nus scarte (… par cuissà cuâi motîfs), a saran distès in biele esposizion intal nestri spazi. Subit daspò al vignarà il moment da lis presentazions di Nadâl e cuissà che no sponti ancjemò alc par furlan…
I titui par furlan cemût sono stâts recepîts dai pordenonês?
I pordenonês, gjavadis lis zonis pedemontanis (cetant vivarosis) e lis fassis dal Tiliment, no capissin tant il furlan e par chest a fasin fadie a preseâ lis iniziativis in lenghe, ma chest nol è un probleme. O rispientìn i guscj di ducj e si indrecìn a chei che, al contrari, a cognossin e a vuelin svissinâsi a la marilenghe. Tes libreriis de citât, i libris par furlan a son stâts vendûts distès, dal sigûr in numar plui bas rispiet a Manià, Spilimberc e Sant Vît dal Tiliment ma plui di cualchi copie e je stade comprade ancje in rive al Noncel.
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +