La Casse di Sparagn F-VJ e invie une colaborazion cu La Patrie dal Friûl.
Dal mês di Novembar la riviste «La Patrie dal Friûl» no si cjatarà dome tes miôr ediculis e librariis o par abonament. Grazie a un acuardi cu la Casse di Sparagn F-VJ (www.carifvg.it), si podarà cjatâle ancje tes filiâls de storiche bancje furlane intes provinciis di Gurize, Pordenon e Udin.
«O vin ritignût di intervignî sotscrivint cheste distribuzion parcè che la nestre linie e je chê di un istitût di credit leât al teritori» al spieghe il president Giuseppe Morandini «par noaltris la lenghe furlane e je un element fondant e indiscutibil dal Friûl storic e par chest lu considerìn un tesaur di mantignî e judâ».
La iniziative e larà indevant par un an e e previôt la pussibilitât pai utents de bancje di podê vê a disposizion i numars che a rivin in ogni sportel «O vin pensât che la maniere miôr par sostignî chest principi e fos chê di dâ continuitâ a une realtât come chê da «La Patrie dal Friûl», une riviste in lenghe furlane che e à un stîl viert e atuâl, che e fevele dal Friûl, ma e je atente ancje a ce che al sucêt tal mont» al continue.
Par podê viodi dulà che si pues cjatâ la Patrie dal Friûl, baste semplicementri verificâ sul sît www.lapatriedalfriul.org dulà che a son segnadis lis filiâls de Casse di Sparagn dal F-VJ. Si trate di 132 sportei distribuîts su lis 3 provinciis «In maniere di vê une rêt il plui pussibil slargjade par podê cuvierzi dut il teritori furlan di nestre competence» al specifiche il president.
«E je vere che al è un moment di crisi» al amet Giuseppe Morandini «ma la storie ancje no lontane de nestre tiere e conferme che propit tes dificoltâts il nestri popul al à savût e al sa dimostrâ trop che al vâl: noaltris o vin decidût di pontâ ancje su la cuistion identitarie propit parcè che o ritignìn fondamentâl no pierdi lis nestris lidrîs e chest nus somee impuartant propit par frontâ ancje i moments di crisi».
Christian Romanini
