«Ancje se la nazionâl irochese e à pierdût la pussibilitât di vinci il Campionât dal Mont 2010 di lacrosse che si sta davuelzint cumò in Ingletiere, e à rivât adore a otignî une grande vitorie tai confronts de opinion publiche: fâ savê al mont che lis popolazions sovranis indigjenis a son inmò chi, a resistin ancjemò, e ancjemò a insistin a fuart a afermâ il dirit di jessi ce che a son». Cussì al à scrit ai 20 di Lui il cuotidian etnic des popolazions indigjenis de Americhe Indian Country Today.
SPORT NASSÛT IN AMERICHE_ E je duncje finide mâl dal pont di viste sportîf la aventure de nazionâl irochese di lacrosse, sport chi di nô cuasi dal dut no cognossût (ancje se la nazionâl taliane e je presinte tai campionâts mondiâi in cors), ma une vore famôs tai Stâts Unîts , dulà che e esist une leghe professionistiche. Si trate di une sorte di bale a man zuiade cun redinis come chês par cjapâ paveis nassude in Americhe in teritori irochês e, di fat, la nazionâl di chestis teritoris e je ametude tai mondiâi come rapresentante dai «paris» dal zuc.
L’ALT AE FRONTIERE_ Cualchi gjornâl talian al veve dât la notizie de scuadre blocade in Olande ae frontiere dal aeropuart viers la Ingletiere par vie di problemis cul passepuart itochês. I Irochês di fat a doprin il passepuart etnic pai viaçs internazionâi di plui di trê desenis, ma il guvier dai Stâts Unîts e chel britanic si son refudâts di ricognossiju. Pes autoritâts no van daûr dai gnûfs standarts di sigurece pes regulis dal antiterorisim dopo dal 11 di Setembar. I amerindis si son refudâts di doprâ il lôr passepuart american e cussì, dopo cetantis provis diplomatichis e une spiete durade une setemane, ai 17 di Lui la federazion inglese e à comunicât la eliminazion definitive de scuadre de competizion.
SOLIDARIETÂT INTERNAZIONÂL_ Par vie de permanence sfuarçade a Amsterdam la scuadre e i membris de delegazion, uns cincuante personis, a àn sostignût un grum di spesis in plui, cirche 100.000 dolars, no cate che la compagnie aerie e ves rinunziât a domandâ lis tassis pe gnove prenotazion che e vignive fate ogni dì.
E cussì James Cameron, regjist di «Avatar», il colossal metafore de colonizazion des Americhis di bande dai Europeans, al à judât i indigjens dantjur 50.000 dolars.
Cheste e tantis altris a son stadis lis dimostrazions di solidarietât di bande di politics e sempliçs citadins di dut il mont. Se e je stade une sconfite sportive, si diseve, e je stade une vitorie dal pont di viste mediatic stant che a ‘nd àn fevelât tancj media tai Stâts Unîts e tal mont. «Si savedi che la scuadre no si è ritirade dal torneu, e o crôt che o vin vint cence mai zuiâ une partide, dimostrant al mont la partignince de sovranitât indigjene tal 21m secul», al à dit Oren R. Lyons, president onorari de scuadre.
___________________________________
UNE EX GRANDE POTENCE DEMOCRATICHE DULÀ CHE COMANDAVIN LIS FEMINIS
I Irochês a son une confederazion di 6 tribûs distribuidis sul teritori di Canadà e Stâts Unîts. La popolazion restade e je su lis 125.000 personis.
A forin une potence fra lis plui grandis de Americhe dal Nord a partî de fin dal 1500, cuant che il profete Deganawidah («Il Grant Pacificadôr») al rivâ a unî lis cinc tribûs te «Leghe (o Confederazion) Irochese des cinc tribûs»; po dopo si ‘nt zontà la seste (i Tuscarora).
La liende e dîs che il profete al fo sburtât di une vision cuntun grant arbul, simbul che si cjate te lôr bandiere (viôt parsore).
LA ORGANIZAZION_ Il sisteme di podê irochês e veve di fonde une sorte di matriarcjât: il Consei de Leghe irochese al jere fat di 50 cjâfs tribù elezûts da lis feminis che par famee a ‘nt vevin il dirit. Duncje, pur jessint il Consei fat su di omps, a vevin di rispuindi a lis feminis de lôr famee che ju vevin nominâts.
Il Consei nol decideve a maiorance, ma al veve di discuti e mediâ fin tant che no si rivave ae unanimitât, e di seguit lis decisions fatis buinis e vevin di otignî la aprovazion de popolazion.
Un sisteme une vore democratic, duncje, tant che dispès si dîs che la Costituzion Americane e sedi stade ispirade de Leghe Irochese e da la sô Grande Leç di Pâs, ancje se no esistin provis di conferme.
I IDEÂI DI UNE NAZION_ I principis di fonde de Leghe Irochese a jerin trê: la salût e il bonstâ dal cuarp e de ment di ogni membri, la pâs fra i singui membris e lis tribûs de union, rispiet e justizie par ogni membri mascli o femine.
Dree Venier
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +