ATUALITÂT – La scuele in mont: invistî te Europe

Istât: timp di vacancis! Il teme des scuelis in mont al scjalde plui dal soreli. Di fat, il ridimensionament scolastic al tamesarà lis piçulis realtâts di mont e cun Setembar si regjistraran gnûfs tais. «Tantis presidencis a saran vueidis pai pensionaments. Al è a pene stât bandît il concors e al larà vie un an prime di vê altris dirigjents de regjon pronts a cjapâsi la cjame, almancul che no vegnin di fûr», e conte la dotore Manuela Mecchia, preside dal I.S.I.S. di Tumieç.
LA REALTÂT ATUÂL_ In cont des unificazions des scuelis primariis e secondariis e dîs: «Il calcul che al ven fat sul organic nol garantìs il fat che un dirigjent al puedi tignî vierts ducj i ples e, in acuardi cui Comuns, a àn di sierâ chei piçui parcè che no je plui garanzie ni di personâl docent ni di personâl ATA (bidei e v.i.). Chest al compuarte une riorganizazion totâl de erogazion dal servizi. Une anticipazion le vin za vude chest an cu la sieradure di Rigulât e di Dimplan; chest atom la situazion e je particolarmentri complesse. L’assessorât montan de provincie, dutune cul centri servizi scolastic dal Friûl de Alte, a vevin cirût di torna a definî – insieme cun ducj i sindics e cul assessôr Faleschini – la rêt scolastiche, cirint di concentrâ i fruts tai ples un pôc plui grancj.
In cambi, si domandave la pussibilitât di vê risorsis in tiermins di progjets, finanziaments di bande  de Regjon, ma no ducj i sindics a àn aprovât il plan. Cussì, fin al mês di Mai, la uniche zone che e veve aderît e sotscrit un acuardi par vê cheste garanzie di servizi cu la Regjon al jere il Tarvisian.
Jo o crôt che il ples piçul, se al à lis risorsis, al pues jessi une realtât che e funzione: nissun al pensarà di sierâ Sauris, ma in situazions tant che Ravasclêt – Comelians, Darte – Plan – Zui, la distance no je un element proibitîf par un acentrament. Note positive: dut chest al puarte une miôr socializazion dai fruts. La int e sta indulà che a son agjevolazions, là che e je une situazion lavorative che e garantìs di podè restâ, là che a son servizis: ancje la scuele e je un servizi, e gjavâlu al vûl dî cressi il smaviment dal teritori.
LIS SUPERIÔRS_ A nivel des scuelis superiôrs, la cuestion e je rinviade al prossim an parcè che il plan al è trienâl e duncje nol è inmò scjadût. Par chel che al rivuarde il probleme dai orientaments scolastics tal  Friûl de Alte, al tocjarà pensâ di ridefinî un bacin plui ampli che nol sedi chel di Tumieç, parcè che la popolazion scolastiche e je chê che je: al è dibant vê doplis orientaments tra Tumieç e Glemone. La cuestion e je chê dai servizis di traspuart: comuts par cui che al decît di lâ viers Glemone e une vore plui complicâts par cui che al decît di vignî viers Tumieç. Chei di Glemone duncje, a sielzin prin di dut di lâ viers Udin.
Cu la riforme, si viodarà ancje de situazion dai orientaments professionâi: si è daûr a riscjâ la lôr muart, stant che no si previôt plui la pussibilitât di vê la cualifiche. La fasse debule che e sielç i professionâi, di solit e je formade di cui che al à vût dificoltâts inte cariere scolastiche e che al  riscje di no cjatâ une rispueste sul teritori. La Regjon e je intervignude dant la pussibilitât di une cualifiche trienâl, come chê de formazion e daspò – su pression nestre – cu la creazion di percors sperimentâi dulà che un frut al pues acuisî intal stes timp il cuincueni di istruzion e i trê agns di cualifiche.
Cheste robe e va potenziade e sperimentade parcè che sierâ – soredut intes zonis periferichis – chestis realtâts, al vûl dî aumentâ la dispersion scolastiche, cu la nassite di fenomens di dificoltât sociâl.
PROPUESTIS_ Cumò o stin cirint di meti il todesc tant che seconde lenghe foreste parcè che la Austrie e sarès un bacin lavoratîf interessant. La idee e je che Cjargne e Friûl a puedin pensâ a une scuele che si vierç ancje viers la Europe.
E je vere che a coventin camarîrs ma forsit e covente ancje int che e sepi comercializâ il teritori, creâ une atrative, une gjestion integrâl di servizis. Par cambiâ la mentalitât, tocje movisi culturalmentri. La scuele e je la agjenzie fondamentâl e l’investiment a lunc tiermin: no tu puedis pratindi di cambiâ mentalitât intes gnovis gjenerazions, ma ben tu puedis creâ une rêt che plan plan e mudi il teritori.»
Marta Vezzi