Sfuei Mensîl Furlan Indipendent
Archivi de Patrie

ATUALITÂT – La minorance linguistiche pe salvece de Scuele

............

Une buine e cunvinte sensibilitât dai mestris in cont ae impuartance de trasmission dai valôrs des lenghis e des culturis minoritariis e pues fâ cuintri ae scjarsetât o ae mancjance di contribûts; chest nol gjave che i politics a àn di fâ il lôr dovê, e clarementri ancje lis fameis.
TAMAU-CLEULIS_ I fruts che a fasin part de scuele primarie di Tamau-Cleulis a son 44 e a vegnin di Tamau, Cleulis, Paluce, Riu e Trep. La carateristiche di cheste scuele e je che si imparin dôs lenghis minoritariis: il furlan e il tamavês (di ducj i fruts, chest an dome dôs fameis a àn decidût di no aderî a nissune des dôs lenghis).
Di cuant che e je nassude la scuele (1978) lis mestris, anticipant la leç 482, a àn simpri puartât indevant ativitâts pe valorizazion, pe tutele e pe difusion des fevelis locâls. Cussì, tai agns a àn podût ancje meti adun il gjornalin scolastic, fâ aprofondiments sul ambient, sui mistîrs, sui tescj teatrâls, sui zûcs: imprescj didatics che a podin jessi doprâts di cui che al vûl svicinâsi e scuvierzi chestis piçulis realtâts di minorancis linguistichis.
«Intai agns – nus contis i mestris – la validitât di chescj intervents e je stade preseade des universitâts di Udin e di Viene e des agjenziis culturâls dal teritori che a colaborin in maniere ative cun cheste realtât».
La impuartance e il spessôr culturâl dai lavôrs fats a àn vût ricognossiments e premis ancje fûr Regjon. Di simpri, duncje, ogni mestri al jude, su la fonde des cognossincis e des competencis personâls, a realizâ chescj percors; di agns a son ativis colaborazions e condivisions cun diviersis realtâts scolastichis che a fasin part di comunitâts cun minorancis linguistichis, no dome regjonâls, ma ancje dal Venit.
In mert ae atuazion de leç 482, intune ricercje promovude dal Ministeri, i fruts di Tamau-Cleulis a àn dimostrât, ancje a distance di agns, di vê conservât e interiorizât il lavôr fat a scuele.
«I riordins de realtât scolastiche – a continuin i mestris – se no son fats intal rispiet dal teritori, dal sigûr a segnaressin in maniere negative il mantignî vivis lis iniziativis culturâls a tutele des nestris lenghis minoritariis, tignint cont de impuartance ancje dal lûc e dal contest indulà chei o sin daûr a lavorâ. Si podarès ancje justificâ le richieste di deroghe dal limit numeric previodût de riforme, sbassant il numar di fruts vuê indicât par ogni pluriclasse».
REALTÂT DI DARTE_ Si spostìn di pôcs chilometris e o lin a dâ un cuc a une altre realtât, vâl a dî chê di Darte. In cheste scuele, di furlan si ’nt fâs pôc. «A nivel culturâl – nus conte il mestri Mario Pustetto – si cîr di fâ cognossi ai fruts lis tradizions e ce che al è leât ae storie e ae gjeografie de Cjargne. Spes i fruts ju puartìn in gjite a scuvierzi lûcs che a son su pe puarte de scuele e che a son plens di storie. Ancje lis recitis a son altris ocasions par svicinâju as tradizions di un timp. Si cîr di insegnâ ancje a lei e a scrivi il cjargnel» Il mestri Mario al pense che al seti pardabon impuartant che il frut al sepi lei e scrivi il cjargnel te variante dal propri paîs. Ma tantis a son lis dificoltâts par lâ indenant: spes no ducj i mastris a son sensibii e disponibii a fâ chestis iniziativis e cun di plui si zonte il probleme de miserie, se no adiriture de mancjance, di contribûts.
Marta Vezzi

Stin dongje ae Patrie

Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +