ATUALITÂT – La int de Bibie

La leture da Bibie par furlan e je stade un grant event, no dome religjôs, ma ancje culturâl. Plui di 1200 letôrs si son ridûts disponibii (cence contâ a ducj chei altris che tra sigurece e organizazion si son dâts di fâ).
Un numar che nol pues no fâ pensâ a dute la int che e je vignude di dut il Friûl. Baste cjalâ il libri des firmês par rindisi cont. Ducj volontaris e soredut, ducj motivâts, ma no duncj cu la stese reson. Fûr de glesie de Puritât o vin domandât a cualchidun, parcè che al jere vignût a lei la Bibie. Lis rispuestis a son stadis une vore impuartantis, propit parcè che cui che lis diseve nol jere un “VIP” ma un di nô. A ducj ur vin domandât sclet: “Parcè sêstu vignût a lei la Bibie”? Lôr nus àn rispuindût cussì:
F.D.S. (11 agns) «Parcè che o volevi provâ a lei alc par furlan e a fâ cheste esperience che mi someave impuartante».
M.D.R. (53 agns) «Lu ai fat di cûr. In memorie e onôr di pre Toni. No dome come predi, ma ancje come om libar e di culture».
R.C. (siore di 67 agns) «O sin un popul! O vin une Bibie! No vino di meti adun ducj e doi?».
A.M. (siore di 66 agns) «Mi plâs la mê lenghe e chel chì al è un mût indulà, ancje jo o pues valorizâle».
E.D.S. (14 agns) «Se no gno pari mi pestave – al dîs ridint –, ma o soi content di vê let alc di cussì impuartant ta mê lenghe».
A.C. (16 agns) «Di frut o soi stât zago di pre Toni, al jere il minim che o podevi fâ par ricuardâlu».
M.D.S. (44 agns) «O ai plui di un debit cun pre Toni».
M.S. (45 agns) «O soi di Visepente paîs dulâ che pre Toni al à lavorât une vore pe traduzion: e za cheste mi pâr une buine motivazion, o speri che e vedi un seguit tes glesiis de int che a vût let la Bibie».
R.S. (74 agns) «O ai podût fâlu doprant la mê, la nestre lenghe, la lenghe
che o ai tetât di mê mari, che se mi vessin fat doprâ une lenghe foreste no crôt che lu varès fat».
A.P. (siore di 48 agns) «O ai dât subit e cun entusiasim la mê adesion
ae leture de Bibie pe impuartance dal event che finalmentri al puarte laude
e onôr a Pre Toni».
M.P. (fantate di 22 agns) «O ringrazii di cûr cui che mi a puartât a cognossince dal progjet e che mi a proponût la leture. Inmò se un mi domande cemût che o ai sielt di partecipâ ae “Leture continue de Bibie par furlan” no savarès ce rispuindi se no altri che la rispueste e je vignude bessole».
M.Q. (siore di 45 agns) «Lei la Bibie par me al è stât un mût par dîi graziis
a pre Toni di dut ce che al à fat e pal grant patrimoni che nus à lassât ancje cu la traduzion de Bibie».
E.P. (38 agns) «Parcè che podê lei la Bibie inte mê marilenghe e je une oportunitât par “meti al stes livel” il Furlan cun cualsisedi altri idiome
no jessint, il nestri, inferiôr a nissun altri».
E.P. (66 agns ) «Di cuant che o ai savût che si steve organizant la “Leture da Bibie par Furlan” mi à entusiasmât la idee di fâ part ancje jo di chest event unic, che al valorize la nestre culture furlane».
Mauro Della Schiava