ATUALITÂT – La diplomazie de Mitteleurope e torne a cjatâsi a Gurize

Ai 21 e 22 di Otubar Gurize e à ospitât il VII Forum Mitteleuropean de Euroregjon di Aquilee, inmaneât de Associazion Mitteleuropa (www.mitteleuropa.it) e ospitât li de sede de Fondazion Cjasse dal Sparagn di Gurize. Personalitâts de politiche taliane, dal gjornalisim di politiche internazionâl e de diplomazie di une dozene di paîs dal Baltic al Mediterani a àn acetât l’invît par confrontâsi sul teme “Il mosaic european e i gnûfs imperis mondiâi”.
POLITICHE INTERNAZIONÂL UGNULE_ La discussion e je stade vierte e indreçade di bande dal president Paolo Petiziol che al à cirût, cui siei intervents, di marcâ la necessitât, crisi o no crisi, di vê une politiche internazionâl ugnule pai paîs de zone de Europe centrâl dentri des istituzions sorestatâls. Par Petiziol cheste aree, pe sô nature geopolitiche e par chel che nus à za dimostrât la storie passade, e je pardabon un mosaic di piçulis tessaris dulà che i nestris popui a spartissin un stes destin. Daspò al à citât il pari de patrie ceche František Palacký, che tal parlament di Viene al disè: «Se la Austrie-Ongjarie no esistarès, varessin vût di inventâle.»
LA SITUAZION DI GURIZE_ Vignint a la citât di Gurize, cence dubis la Associazion i rive a puartâ lustri e interès a nivel internazionâl. Cheste afermazion e je stade laudade ancje dal consilîr regjonâl Gaetano Valenti (PDL), che al à fevelât di cemût che dome i sindics di Gurize e Triest, in Italie, a àn mistîr di vê a ce fâ cul forest.
Il senatôr Stefano Stefani (Lee Nord), president de Commission dai afârs cul forest, al à fevelât dal moment storic che o stin vivint. Muarte la ete des ideologjiis, e torne chê des identitâts; chest si riflet su la politiche internazionâl cuntune gnove polarizazion dal podê. O viodìn la Turchie bandonâ ogni vocazion europeiste par cjapâ lis brenis de primevere arabe, intant la Russie e torne e picjâ la aquile imperiâl su la Duma e il Brasîl al sosten lis economiis europeanis.
INTERVENTS DAI OSPITS_ I ospits forescj e àn vût ponts di viste pardabon interessants, une sintesi di cualchi intervent: Olga Gonchareva, presidente de Assemblee da lis Nazions de Moldavie e à fevelât di cemût che il so paîs di cjate fracât fra il mont latin e chel sclâf, un stât cun 4 milions di abitants che a àn lenghis e religjons difarentis. «Di cà di nô o vin un pont di viste particolâr su la politiche internazionâl in Europe» e à dît.
Il segretari gjenerâl dal CEI (Central European Initiative) Gerhard Pfanzelter al à laudât la ocasion dal Forum, unic puest dulà che la diplomazie e pues fevelâ cul cûr in man. Gurize al è un puest perfet, al à sierât.
Pal ambassadôr gjenerâl de Polonie in Italie e je la integrazion il plui grant insegnament che la Europe e pues dâ, ma l’interès economic e je la benzine pal interès nazionalistic. I volarès une Union plui fuarte, parcè che in dì di vuê di cualchi bande in Europe e je simpri une elezion, cemût si fasie a costruî un progjet unitari?
Andrej Veselovskij, dal Ministeri pal forest de Ucraine, la Europe e pues fâ concorince dome se ponte su la cualitât parcè che no rivarà mai a un nivel di integrazion interne a pâr di Nord Americhe e Asie sud orientâl.
I rapresentats di Bielorussie e Moldavie a àn fevelât de strategjie russe in Europe centrâl, dulà che e cîr di “vendisi” come une alternative buine a la Union Europeane, stant che ai timps de URSS la potence russe no jere economiche, ma politiche e militâr. Chest par colpe dai paîs plui a soreli a mont (massime France, Gjermanie e Grande Bretagne), une vore sierâts bande il colòs rus.
Su la situazion russe o segnalìn la presince dal nomenât corispondent de Rai Sergio Canciani, che al à tirât lis orelis sei a la censure russe sei a chê ocidentâl sui fats de vuere in Gjeorgje.
L’APONTAMENT CU LA CRAVUAZIE_ Sierant, il president Petiziol adun cu la consule cravuade Nevenka Grivnić, al à volût dâ apontament par fâ fieste insieme ai 1n di Lui dal 2013 pe jentrade de Cravuazie come 28n membri de Union Europeane.
Michele Calligaris