ATUALITÂT – Internet e diaspore: biel cirint i furlans pierdûts

Esther e je nassude in Argjentine di pari furlan, emigrât tal 1930. E rapresente il Fogolâr Furlan de sô citât di cuant che al è nassût. 73 agns, ma la tipiche energjie des feminis furlanis; e je vignude in Italie a cjatâ i parincj e, cun chê, par cirî materiâl sul Friûl, che al puedi sei disfrutât pe sô ativitât te regjon di Salto Grande.
Ce si isal mantignût des tradizions furlanis in Argjentine?
La Argjentine e je grande e in dutis lis regjons no je le stesse situazion.
A Colonia Caroya si fevele ben par furlan: a son stadis mantignudis fiestis, sagris, bai, custums tradizionâi. Ancje inte regjon di Paranà e di Rosario e je stade mantignude la furlanetât. Un pôc mancul in Concordia. Il Concordia Friuli Club al nas tal 1989: e covente tante fature, tant impegn, massime par cjapâ dentri lis personis e in particolâr i zovins, impegnâts tal lavôr di ogni dì. Si fâs ogni an la «Fieste dal emigrant» cun ducj i emigrants talians; pal rest, al è un grant limit pe mancjance di spazis par cjatâsi. Invezit i piemontês, i trentins (che a son il grup plui fuart), i calabrês e i puliês ju judin i sindacâts a otignî un puest par riunîsi.
Cuâl ise in Argjentine la idee dal Friûl di vuê?
No si à une idee clare, lis informazions a son limitadis. A mancjin i contats, i gjornâi, lis informazions – ancje in forme di newsletter – par savê, par confrontâsi. Cualchidun al à tacât a preparâ mailing lists (listis di direzions di pueste eletroniche, N.d.R.) par informâ, ma si va biel plancut .
Internet: un grant jutori par cirî lis fameis origjinariis?
Prime di Internet, cirî la documentazion su la proprie famee al jere complicât. Bisugnave passâ pal Consolât talian: boi, cjartis, documents che no si cjatavin.
Cumò il Consolât no si interesse plui di chestis situazions. Internet al è un grant jutori (ancje in gracie dal sît www.friulinprin.beniculturali.it dal archivi di stât di Udin). Une part impuartante le fâs ancje la organizazion «Friuli nel mondo».
Cuâi sono i leams cun «Friuli nel mondo»?
E je une otime iniziative che e procure di fâ almancul une riunion al an in Argjentine, dulà che si cjatin ducj i rapresentants dai centris furlans. Si è simpri invidâts a meti adun tantis iniziativis, ma al sarès un pôc di rinfuarçâ e di miorâ il sisteme di comunicazion. E varès di jessi plui comunicazion tra la sede centrâl e i varis centris. In Friûl, o speri di rivâ a lâ inte sede centrâl e a discuvierzi cualchi altre vie di comunicazion. Lis riunions a son buinis par scambiâsi informazions, par scuvierzi cemût che altris a àn risolvût problematichis tecnichis e juridichis.
Gnovis tindincis a puartin a meti in contat il mont economic dal Friûl cu lis realtâts emigradis. Ise une buine idee, si puedie fâ, o isal dut un sium?
Al è un bon sium, ma al è tant ce fâ ancjemò. Dal sigûr si à di lâ in miôr, massime perfezionant lis tecnichis di comunicazion.
L’obietîf, cuant che o tornarai in Argjentine, al sarà chel di promovi la culture furlane: mostris fotografichis, musiche furlane, e magari ancje un cors di furlan (une lezion e coste tra i 80 e i 100 pesos! (16-20,50 euros), par cognossi lis tradizions ma ancje i valôrs de famee, de religjon e dal rispiet pal lavôr che a son daûr a pierdisi. O speri di cjapâ sù avonde materiâl in chest viaç par meti adun tancj progjets.
Mara Piccoli