ATUALITÂT – Il Museu de Emigrazion di Cjavàs

Vuê lis stazions dai trens de Pedemontane a son in ruvine e il trafic su lis sinis nol è cuasi plui, ma fint a cualchi an indaûr di chi a partivin une vore di furlans.
Si fermìn a Cjavàs, provincie di Pordenon, dulà che il prin tren al è rivât tal 1930. Nus da il bon acet Michele Bernardon, segretari de Efasce (Ente Friulano Assistenza Sociale e Culturale Emigranti) e grant passionât di emigrazion furlane.
Michele nus compagne pes stanziis de sezion “Lavôr e emigrazion” dal Museu provinciâl de Vite Contadine “Diogene Penzi” e la part dal ecomuseu “Lis Aganis” dedicade a lis scuelis professionâls di dissen.
Il museu di Cjavàs, tra i prins in Italie e unic in Friûl, al è stât screât tal 2000 e, sot de gjestion de Provincie di Pordenon, al jentre tal progjet regjonâl Ammer (www.ammer-fvg.org), presentant 12 sezions tematichis cuntune vore di materiâl iconografic, documents origjinâi, imprescj di vore. E no podeve mancjâ la valîs di carton. «Vuê al è di mode cuasi meti in cuintriposizion la valîs di carton cun chê clamade “valîs eletroniche”, ma chei furlans che a partivin îr a vevin dentri un patrimoni di cognossince e mistîr une vore siôr» al fâs presint Bernardon.
Determinantis par cheste formazion a forin lis scuelis professionâls di dissen par ciment e teracis, cuasit simpri promovudis des Somsi, des Cooperativis di Consum e Lavôr, di cualchi mecenate e dai comuns.
Simpri Bernardon nus mostre une letare dai 19 di Setembar dal 1929 de Famee Furlane of North America che e compagnave une donazion pe scuele di dissen di Cjavàs par ringraziâ de otime preparazion dai zovins che a rivavin tai Usa par lavorâ tes impresis edilis dai furlans socis de Famee. Lis scuelis a lavorarin a plen regjim tra i agns 20 e 50 deventant un esempli tipic furlan di autonomie e sussidiarietât che però si è sfantât cu la centralizazion de istruzion e la nassite des scuelis mediis e di inviament professionâl.
Cui che al ves materiâl su la emigrazion o che al pues dâ sugjeriments, indicazions e informazions su la diaspore furlane, al pues contatâ il Comun di Cjavàs telefonant al 0427-77014 e cul stes numar al pues prenotâ la visite al museu.