ATUALITÂT. Il festival salvadi

«Cormôr Salvadi» al è di agns il festival plui informâl, zovin e vivarôs che si davuelç in Friûl. Ancje la edizion di chest an e à riservât sorpresis e confermis. O vin sintût Pauli Cantarut, un dai curadôrs de organizazion.
Pauli, Cormôr Salvadi 2008:
il spirt isal simpri chel?
Sigûr: cui che al è vignût lu à podût viodi. L’apontament si clame “salvadi” parcè che si davuelzeve intun cjamp, di cualchi an lu fasìn li dal spazi de Festintenda di Mortean. Salvadi ancje parcè che al è nassût cun chê di dâi une pussibilitât di fâsi viodi e di fâ esperience aes espressions plui gnovis e zovinis de culture furlane. In cjamp musicâl di ca a son vignûts fûr il grup dai Trastolons, par esempli, e ducj i zovins rappers furlans.
Mi visi dai prins tocs di freestyle in marilenghe improvisâts di Passion (il freestyle al è une sorte di rap li che tu âs di inventâ rimis sul moment, ndr)…
Vere, e no stin a dismenteâ ancje il teatri e la poesie.
Tal cjamp musicâl, segnalinus une conferme e une sorprese di cheste edizion.
Rispueste facil. La conferme al è Loris Vescovo che al à presentât il so gnûf disc “Borderline”. Un lavôr une vore biel e rafinât che lu à presentât cu la violonceliste Julia Kent, une che ultimementri e à colaborât cun int une vore valutade te sene alternative rock, tant che Devendra Branhart e Anthony & the Jhonsons. La sorprese al è il disc dai R.Esistence in dub, grup di dj Tubet. Il prin disc reggae di chenti: fin cumò il gjenar nol jere stât praticât te musiche furlane.
Vie pes seradis si è viodude ancje la sculture
cun «Spicepiere»…
Sì, cheste e je une iniziative fate in colaborazion cul Comun di Mortean. Za l’an passât o vin vût i scultôrs cul len. Ogni an o vin chê di presentâ un gnûf  “materiâl”. I scultôrs a realizin lis oparis vie pe manifestazion, cussì la robe e devente sie laboratori, sie performance. Lis statuis che a son stadis creadis a saran instaladis ator pal teritori dal Comun di Mortean.
Dree Venier
______________________________________
Ce che al jere al Cormôr Salvadi 2008
VINARS AI 26 DI SETEMBAR
a lis 21.00
Zornade europeane des
lenghis conciert cun
Sam Karpienia
(Ocitanie – FR),
Loris Vescovo (Friûl)
feat. Julia Kent (USA)
SABIDE AI 27 DI SETEMBAR
a lis 21.00
An internazionâl des
lenghis conciert cun
Lisa Stern (A), Priska (Friûl),
Mojra B dj set
VINARS AI 3 DI OTUBAR
a lis 21.00
Cormôr Dubwise
R.esistence in dub (Friûl)
presentazion dal cd
VITE CUN CALME
(Musiche Furlane Fuarte)
Pansilecta dj set
SABIDE AI 4 DI OTUBAR
a lis 21.00
Gnot Hybride
Mahjongg (USA)
D.S.P. (Friûl), Lak dj set
DOMENIE AI 5 DI OTUBAR
a lis 21.00
O voi ator pal prât
animazion pai fruts cul
magjic Adrian & Wido
conciert cun Bande Tzingare
Fabian Riz Orquestra
Teatro Incerto
Bessôl: un arbitro tal bunker
cun Claudio Moretti,
regjie Fabiano Fantini,
prod. CSS teatro stabile
di innovazione del FVG
Par dute la durade
de manifestazion
«Spicepiere»
Simposi di sculture
su piere cun Edi Carrer,
Nico Colle, Pablo A. Garelli,
Alvise Santin.