ATUALITÂT – Il bilinguisim al è un vantaç

Bilinguisim? Un vantaç pai fruts. Cressi intune cjase dulà che si fevelin plui lenghis al insiore il cerviel dal frut. No dome al impare a movisi jenfri lis lenghis de mari e dal pari, ma al disvilupe abilitâts cognitivis plui elastichis, une volte metût a confront cui amîs «monolengâi». A cheste conclusion al è rivât un studi publicât di Pnas (vâl a dî, il gjornâl uficiâl de United States National Academy of Sciences) e realizât dal professôr Jacques Mehler, diretôr dal laboratori di Lengaç, cognizion e disvilup de Sissa di Triest, insiemit ae studiose Agnes Kovacs. Seont i risultâts de ricercje, i fruts a contat fin di piçui cun dôs o plui lenghis a disvilupin strategjiis di aprendiment plui dinamichis.
PLUI SVELTS_ Mehler al à spiegât che cuant che i piçui a àn un an di etât a son bogns di imparâ in maniere plui svelte e elaborade rispiet ai fruts de stesse ete ma usâts a scoltâ e a fevelâ dome intune lenghe.
Ve alore che vivi intune famee dulà che i gjenitôrs a fevelin plui lenghis al jude no dome lis funzions esecutivis – procès fondamentâi par meti in vore compits no dome verbâi – ma ancje di gjestion e di planificazion di ativitâts di coordenament des azions. Tal studi a son stâts metûts a confront fruts di 12 mês – sîs bilengâi e sîs monolengâi – impegnâts in compits che a domandin funzions esecutivis.
L’ESPERIMENT_ Le canaie, scoltant stimui sonôrs cun peraulis e struturis diferentis, e veve di induvinâ di ce bande che un pipinot al sarès saltât fûr tal scherm di un pc. Cun ciertis peraulis, il pipinot al saltave fûr di man drete, cun altris di man çampe. Chei esponûts tes lôr fameis a plui lenghis a dimostravin di capî daurman il truc, rispuindint ben e svelts. No cussì chei altris, che a fasevin di fat plui fature a distrigâsi e a meti dongje lis peraulis de bande di dulà che al sarès vignût fûr il pipinot.
La spiegazion e je che il cerviel dal frut esponût a stimui linguistics diviers al è une vore plui elastic. Ma chest nol vûl dî jessi plui inteligjents – al à spiegât Mehler – ma plui alenâts e par di plui cence tante fature.
UN IMPREST PLASTIC_ Il cerviel dal om – daûr di ce che a disin i esperts – al à une grande plasticitât e nol à dificoltât a reagjî e a coordenâsi jenfri diviers stimui. In sumis, nol fâs confusion.
Ancjemò prime di scomençâ a fevelâ un frut, devant di dôs lenghis diferentis, al è bon di no fâ confusion e di fâ propris ae svelte lis regolaritâts linguistichis.
Dut câs, se il vantaç al ven fûr daurman tai fruts che a vivin intun ambient plurilengâl, chei altris – al rimarche Mehler – cul passâ dai agns, a varan ocasions par recuperâ la diference.
Sonia Sicco