Sfuei Mensîl Furlan Indipendent
Archivi de Patrie

ATUALITÂT – IGT: e i vins furlans a son «Venezia Giulia»

............

Un rap di Ucelut, segont la regjion IGT Venezia Giulia
Un rap di Ucelut, segont la Regjion "IGT Venezia Giulia"

La Indicazion Geografiche Tipiche (plui famose come IGT) e je une marcje di origjin che e  cualifiche i vins produsûts intune zone specifiche, che e presente uniformitât ambientâl e che e à di dâ carateristichis omogjeniis al vin stes.
LA SITUAZION_ Intune piramide di cualitât, a son vins di cualitât che si dividin in DOCG e DOC, e vins di taule che si dividin in IGT e vins di taule gjenerics. In Friûl, a son Ramandul e Picolit che a son DOCG, e po vot  DOC: Carso, Collio, Colli Orientali Friuli, Friuli Annia, Friuli Aquileia, Friuli Grave, Friuli Latisana, Friuli Isonzo e la interregjonâl Lison-Pramaggiore cul Venit.
La leç 164/92 (come 5 art. 24), par tutelâ lis DOCG e lis DOC, e improibìs di doprâ  par une IGT  cualsiasedi non za utilizât par DOCG e DOC. Dal moment che «Carso» e «Friuli» a son za presints inte DOC, si veve di cjatâ une soluzion par nomenâ il vin IGT che e fos dut câs indicative de zone che no si podeve doprâ il non (Come 1 art.7).
Par fâ un esempli, il Trentin al à inventât, tant che IGT , «Vigneti delle Dolomiti».
DECISION… PE UNITÂT_ L’Assessorât regjonâl de Agriculture dal periodi, metût di front a cheste cuestion, poiadis di bande lis propuestis, al à pensât di scartâ la peraule «Friuli» e tignî invezit «Venezia Giulia» par denominâ la IGT e par fâ viodi la unitât regjonâl (cussì a disin i gjornâi de epoche). Si podevin fâ altris sieltis ancje di fantasie (Tiere Furlane, Vignis Furlanis…), domandâ plui IGT (come che a àn fat tantis regjons, ancje piçulis) ma cussì e je lade, e cumò la IGT Venezia Giulia e cjape dentri dut il teritori aministratîf des provinciis  di Gurize, Pordenon, Triest e Udin.
A Vinitaly, l’exTocai diventât «Friulano», aromai al è lançât sul marcjât insieme cul slogan «Friulano totalmente friulano», a rapresentâ prodots e vins dal teritori dal Friûl. E alore borascjade, parcè che masse «Friulano» al fâs mâl.
ESEMPLI TOSCAN_ In Toscane, che di  vin bon si intint, cualchi produtôr, par podê produsi vins di cualitât alte, ma dulà che i dissiplinârs di produzion a jerin masse strents, al à prodot vins IGT che i specialist americans dal vin a àn clamât «Supertuscans»: si fevele di Tignanello, Ornellaia, Sassicaia. Chest ultin, patecipant  tal 1987 a un concors a Londre, al à vinçût sui grancj vins di Bordeaux.
E i furlans, lassant pierdi lis cjartis boladis e lavorant di cualitât, saressino bogns di produsi alte cualitât e creâ Superfurlans? Cheste je le sfide: ai produtôrs la rispueste.
Mara Piccoli

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +