ATUALITÂT – I 90 de Filologjiche Furlane

«La disfide e je chê di rivâ a cunvinci che la cuestion de lenghe e culture furlanis e je struturâl ae nestre realtât».
Cussì l’assessôr regjonâl ae Culture, Roberto Molinaro, al è metût il lûs il berdei plui complès che al sta vivint il grant patrimoni dal Friûl e lu à fat dilunc il ricuart uficiâl dai 90 agns de Filologjiche furlane, a Gurize ai 21 di Novembar stât. Une date dulà che si è dit de intense storie che si à daur des spalis, ma soredut ce che nus spiete pal avignî, li che, par Molinaro, «al è compit des istituzions sburtâ pal salt di cualitât».
Peraulis di aur se la «preocupazion» dal president de Socie, Lorenzo Pelizzo, e je che in dì di vuê «no je une cussience politiche ancjetant impuartante» e «la plui part dai politics no àn la sensibilitât juste a rivuart dal furlan».
E chest, al à ricuardât, biel che «il 64% des fameis al domande l’insegnament dal furlan a scuele pai lôr fruts. Un bon segnâl pal avignî».
Chel avignî che i cjalavin cun tante ferbince i fondadôrs che ai 23 di Novembar dal 1919 si cjatarin tal municipi di Gurize par fâ nassi la Filologjiche furlane, cul proposit di impedî la sparizion dal furlan e di sburtâ par rinfuarcîlu. Ae fonde dal progjet, il principi e la convinzion che «tal svilup civîl dai popui, la lenghe che a fevelin e je il patrimoni plui impuartant e carateristic», come che al ricuardave tai 30 agns de Socie il president di chê volte, Tiziano Tessitori. In zonte a chest, l’intindiment di dimostrâ, propit a Gurize, il tornâ insieme di dut il Friûl tant che Patrie, dopo che, finide la prime Vuere Mondiâl, ancje il Gurizan al jere passâts de aministrazion austriache sot chê dal Stât talian.
E vuê, al à zontât Pelizzo dilunc lis manifestazions inmaneadis tal mês di Novembar par il 90n, la Filologjiche «no à di mudâ i trois li che e à corût fintremai cumò». Ven a stâi, «e à di cjalâ indevant simpri te direzion di valorizâ no dome la lenghe, ma ancje la culture, lis tradizions, la toponomastiche, dut ce che al rivuarde il mont furlan, doprant ancje lis gnovis tecnologjiis e i mieçs di comunicazion». Une ativitât «no dome linguistiche e leterarie – come che al è scrit tal at de fondazion –, ma storiche; no dome storiche, ma morâl e politiche».
De fonde in ca, la Filologjiche e à vût il merit di tignî simpri alt il spirt furlan, ancje cuant che il Stât al jere contrari, come sot dal Fassisim. No à mai dismetût la sô ativitât. Dal 1948, l’inviament dai cors di lenghe e culture furlanis che si inmanein ogni an e che a àn ancjemò un grant sucès. Cun di plui, si presein la sdrume continuative di iniziativis pe conservazion des tradizions, des particolaritâts furlanis, dal mût di jessi di chest popul.
Cumò a son «otims», al à dit Pelizzo, i rapuarts cu lis istituzions e lis associazion che a lavorin a pro de lenghe e culture furlanis, in prin cu la Universitât dal Friûl. La sperance dal president e je chê «di meti ator di une taule ducj i sogjets che a promovin la marilenghe, par lavorâ insieme».
Te ocasion dal 90m, il vice president de Socie, Federico Vicario, al à rimarcât che «lis normativis europeanis a impegnin lis aministrazions publichis a svilupâ azions par preservâ lis lenghis mancul pandudis». In cheste suaze, «un puest impuartanton lu àn i istitûts di culture, che a àn di dâ il contribût des lôr esperiencis e competencis».
Ae Filologjiche, che te sô storie e à vût tant che presidents Ugo Pellis, i senatôrs Gortani, Tessitori e Pelizzo, Alfeo Mizzau, i tocje però tacâ il 91m di vite cun contribûts regjonâi taiâts dal 20 par cent. Però, la Regjon e à decidût di destinâ 500 mil euros par il restaur de sede storiche de Filologjiche (Palaç Mantica) a Udin.
Antonella Lanfrit