ATUALITÂT – I 20 agns di Avostanis

Al torne a fâsi sintî tal cjalt un event che di 20 agns al met adun culture e furlanetât. O fevelìn di Avostanis. Un event che al clame dongje tante int a Vilecjasse di dute la regjon e ancje di fûr. Un segnâl clâr che cuant che la divestitât e à a ce fâ cun origjinalitât e pues puartâ ancje a cualitât.
La anime dai events ai Colonos al è Fridrì dai Ros, gjornalist e coordenadôr di Avostanis insiemit al grop culturâl omonin.
Ogni an a Avostanis si sielç un teme che diferents artiscj e inteletuâi lu interpretin a lôr maniere ân il titul al è impegnatif e stiçant: Naturalia Artificialia. Di fât il confront jenfri ce che al ven creât e ce che al esist par “nature”. Il prin esempli che al ven di pensâ al è chel dal mont reâl e chel virtuâl simpri pui presint cul cressi de tecnologjie. Un aspiet che al podarès gambiâ la maniere di viodi il mont, al bastarès cjalâsi ator tal nestri vivi di ogni dì. Ma chel chi al è dome un esempli, il plui sempliç di tirâ fûr. Dût al è scomençât miercus ai 27 di Lui aes 21.00, cu la leture da La rivolte dai jeols dal scritôr furlan Luigi Rapuzzi, let di Massimo Somaglino. Si continuarà par 17 events/ apontaments in dut, di no pierdi, che a laran indevant fin a la ultime zornade che e sarà sierade dal grop musicâl dai FLK e dal Teatri Incert cul spetacul musicâl teatral Aquilea post Christum natum. Un mût, chel dal complean di Avostanis, par rispuindi ai plui vuarbs che a fevelin cence pensâ masse, disint (fasint) che in Friûl no si fasin dome sagris pensant a mangjâ o bevi. De periferie, di un paisut dal Friûl di Mieç la rispueste clare, sclete e discrete, in stîl furlan. No je simpri cuistion di grandece, mediatiche in primis, e no stin a fâ nons ancje se o vin clâr di ce bande cjalâ…; cualchi volte e je ancje cuistion di cualitât e di origjinalitât.
Il program complet al è pussibîl cjatâlu sul sît uficiâl da associazion culturâl dai Colonos (www.colonos.it)
Mauro Della Schiava