Sfuei Mensîl Furlan Indipendent
Archivi de Patrie

ATUALITÂT. Furlaniscj o filoforescj?

Marco Stolfo

«Intelligenza con il nemico» e je une des acusis che une vore dispès a son stadis fatis indenant cuintri di cui che dilunc vie dai ultins cent agns al à vût pensât, dit e fat alc a pro dal autoguvier dal Friûl e dal ricognossiment des sôs lenghis propriis e dai dirits de sô int. Daûr di cheste interpretazion, pensâ e fâ alc a pro di un Friûl «diferent» o «plui furlan» no varès nissune fonde e nissune origjinalitât e al sarès dome une posizion inventade e saborade dal forest, de bande dai diviers nemîs dal Stât talian. In realtât no je cussì.

Bons. Luigi Faidutti dal Partît Catolic Popolâr Furlan di Gurizze intal Friûl austroungaric
Bons. Luigi Faidutti dal Partît Catolic Popolâr Furlan di Gurizze intal Friûl austroungaric

L’INIZI DAL 900 A GURIZE_ Se al è par sigûr un fat che inte Prime Vuere Mondiâl l’Imperi austroungaric al fasè une cierte propagande filofurlane tal Gurizan, chest nol vûl dî che lis posizions dai popolârs furlans a pro de autonomie o de autodeterminazion a fossin fiis di chê captatio benevoletiae asburgjiche. Pluitost a divignivin di une clime politiche, culturâl e sociâl che e à lis sôs lidrîs ben prime de «Vuere grande», dulà che e jere za madressude une cierte vision dal Friûl, testemoneade par esempli de azion e dal pinsîr di Bonsignôr Luigi Faidutti e di Giuseppe Bugatto.
Cu la fin de esperience beliche cheste vision si infuartì massime tal cjamp dal moviment operari, dulà che la cuistion furlane e vignì insuazade ad implen intune interpretazion internazionaliste dai rapuarts politics, economics e sociâi. Il snait e la grinte che Zuan Minut al pandeve tai siei comizis infogâts a son une testemoneance fuarte di chel moment storic. E jere pardabon une situazion dinamiche e vivarose, cemût che si pues capî sedi che si consideri il coment ironic jessût su «Il lavoratore della sera» che, scuasit fasint bocje di ridi, daspò che i carabinîrs a improibirin a Minut di fevelâ in public, al proviodeve l’inviament di un percors indipendentist pal Friûl, sedi che si tegni cont de difusion, daûr di ce che si lei su «Il lavoratore friulano», dal «desiderio augurale di una repubblica friulana» tal 1920.

Daûr de testemoneance di Mario Lizzero (te foto), leader comunist furlan, si pensave ae pussibilitât che dopo de Liberazion al fos metût adun un stât furlan
Daûr de testemoneance di Mario Lizzero (te foto), leader comunist furlan, si pensave ae pussibilitât che dopo de Liberazion al fos metût adun un stât furlan

A CJAVAL DES 2 VUERIS_ Nol è ni just ni crodibil ridusi il ricognossiment de nazionalitât furlane in diviers documents dal Esercit popolâr di liberazion jugoslâf tai prins agns Cuarante dal secul passât ae volontât di zontâ il Friûl o almancul une sô part a la gnove Jugoslavie di Tito, ma e jere dome une aplicazion pratiche dal principi nazionâl cemût che al vignive proferît tai «tescj sacris» di Lenin e Stalin. Cun di plui, dongje des elaborazions teorichis dal 1919-1921 si à di tignî cont di riflessions fatis su chescj argoments ancjemò tal 1936, duncje prime de Seconde Vuere Mondiâl, cuant i comuniscj slovens gurizans Srebrnicˇ e Marinicˇ a crodevin che la soluzion di tancj problemis di chenti e sarès stade la costituzion di un Stât furlan-sloven. E daûr de testemoneance di Mario Lizzero, cuant che il stes Srebrnicˇ e plui tart Bebler a fevelavin ai comuniscj furlans di lenghe e nazionalitât furlanis no vevin chê di zontâ une republiche in plui a chê che sarès stade la Federazion Jugoslave ma a pensavin ae pussibilitât che dopo de Liberazion al fos metût adun un stât furlan indipendent o e vignis fate sù, dentri dal Stât talian, une entitât teritoriâl e aministrative cuntune sô fuarte autonomie.
INDIPENDENTEMENTRI DAL NAZISIM_ Un altri (pseudo)argoment che al ven doprât par dâi cuintri al cussì clamât «particolarismo» furlan al è chel che lu lee ae ocupazion naziste. Ancje in chest câs si fâs confusion fra dêt e lune. E je vere che il Gauleiter Friedrich Rainer al segnalà a Von Ribbentrop che i furlans a vevin di jessi calcolâts une nazion divierse di chê taliane e che i todescs parons dal Adriatische Küstenland a pensavin di podê doprâ cheste specificitât in maniere compagne che cui bretons in Bretagne, ma chest al conferme che a esistevin bielzà di timp ideis diferentis sul Friûl, indipendentementri dal nazisim. E al va zontât che i ocupants no cjatarin nissune poie de bande furlane e che anzit il sfuei «La Voce di Furlania», che al varès vût di jessi l’imprest de propagande furlane filonaziste, al dave vôs ae classiche vision dal Friûl sotan e funzionâl pal nazionalisim talian: chel concet di «Piccola patria», za pandût prin dal Fassisim, dilunc vie dal Regjim e ancje daspò de Liberazion, fintremai in dì di vuê, che al è ce che di plui «cuintrifurlan» che si puedi pensâ e proponi. Une idee che e reste tâl ancje se cumò e ven platade daûr de espression furlane (?) «Piçule Patrie».
Marco Stolfo

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +