ATUALITÂT. Fiis e fiastris

A son dîs tra ents e agjenziis i struments che la regjon e dopre par dâ atuazion pratiche aes sôs politichis. Si va de Agjenzie Regjonâl pe protezion dal Ambient (ARPA) fin ae Agjenzie di informazion e Acet turistic (AIAT), passant pe Agjenzie pal dirit Universitari e pal Ent de Tutele de Pescje.
No je dome la Agjenzie pe Lenghe Furlane a davuelzi la opere di jutori de Regjon ma chel che al somee clâr al è che la Arlef e je simpri di plui tratade come se e fos une sorte di ent minor tal panorame regjonâl.
Nissune altre Agjenzie, di fat, e à patît un tai gjeneric dal 20% come che al è sucedût ae Arlef e, soredut, cjalant un tic la situazion di chês altris Agjenziis si à subit la impression di jessi devant a ents une vore struturâts e une vore considerâts de Aministrazion Regjonâl.
Cjapìn, par esempli, la situazion de Arpa. E je, probabilmentri, une des Agjenziis plui impuartantis de nestre Regjon, cuntune direzion centrâl e ben cuatri dipartiments teritoriâi, un par Provincie. A son ocupâts, contant dome i dirigjents, 40 personis, 8 afidâts ae direzion gjenerâl, 32 tes diramazions teritoriâls. Un numar impressionant se confrontât cu la dotazion di personâl atuâl de Arlef.
Identic discors al podarès jessi fat pe ARERAN là che il regolament interni al proviôt doi dirigjents e 10 dipendents che si à di zontâur un president, un comitât diretîf, un diretôr e un responsabil tecnic pe contratazion. Ancje chi une biele dotazion di personâl par un organisim che al à “dome” di davuelzi une funzion di rapresentance a nivel regjonâl e in sede di contratazion coletive des Aministrazions dal Compart Unic Regjonâl.
I amîs de Agjenzie Regjonâl pe Lenghe Furlane a àn di jessi contents. Cualchidun al sta piês di lôr e ancje se al trate argoments une vore delicâts nol è rivât a evitâ la pratiche dai tais regjonâi. O stin fevelant de Agjenzie Regjonâl pe Sanitât, che dal prin di Zenâr di chest an e je stade soprimude e lis sôs competencis a son stadis centralizadis inte Direzion Regjonâl a Triest. Lis professionalitâts e i compits a restin ma, a nivel formâl, la Agjenzie no esist plui, ancje se tai ultins agns e veve vût un rûl cetant impuartant te programazion sanitarie regjonâl.
Cumò la domande e ven naturâl: cence une plante organiche definide, cuntun tratament di ultime de classe e cun pocje considerazion di bande de Aministrazion Regjonâl, nol sarà migo che cualchidun al à decidût di fâ fâ ae Arlef la stesse fin de Agjenzie Regjonâl pe Sanitât?
REDAZION