ATUALITÂT – E torne “Patrie dal Friûl”

Glesie Furlane e à sierât il 2008 cuntun regâl pai furlans: l’anuari “Patrie dal Friûl”, riviste che e puarte il storic non dal gjornâl fondât di Felix Marchi e di pre Bepo Marchet.
Come che si lei ancje tal editoriâl firmât di Christian Romanini e Roman Michelot la finalitât de riviste, rignuvide tal formât e te grafiche, e je “chê di fâ un pôc il struc de ativitât de nestre associazion. Ma no je dome un regâl par chei che za nus stan dongje e che cussì a puedin vê un ricuart di ce che salacor a àn za vût maniere di vivi cun nô dilunc di chescj 12 mês. Anzit, la intenzion e je chê di rivâ tal cûr e tal cjâf di chei che inmò no àn vût la pussibilitât di cognossi lis nestris bataiis”.
Di fat si cjatin sedi intervents relatîfs a lis cunvignis di Vençon, li che vie pal an si davuelzin lis conferencis inmaneadis de associazion, ma ancje une prime part dedicade a la memorie di pre Antoni Beline cuntun so intervent denominât il “Cjanton” e une schierie di articui che a ricuardin lis numerosis iniziativis che vie pal an ents e associazions a àn volût par ricuardâlu. Te riviste si cjate ancje une sezion di studis e documents che e presente diviersis testemoneancis su cuistions che a rivuardin di dongje Glesie furlane.
Un test duncje che al met adut i ats di un an di impegn e che al è insiorât des bielis imagjins dai mosaics de Basiliche Mari di Aquilee che a compagnin il letôr dilunc des pagjinis.
Christian Romanini