ATUALITÂT – E se la vere strassarie e fos finanziâ cierte stampe?

Za tal numar stât o vin fevelât dai articui jessût su l’Espresso e il suplement dal Corriere della Sera «Io Donna». «Inchiestis» fissis di erôrs, imprecisions, fîs di chê che e samee une  tesi precostituide.
Lis redazions di chei gjornâi a son stadis jempladis di letaris di furlans che a àn protestât. Lu savìn parcè che a son stadis publicadis sul blog dal Comitât 482 (par viodi, lait su la rêt ae direzion http://com482.blogspot.com/). Mancul mâl che lis vin podudis lei li, parcè che sul Espresso nol è jessût nuie, e Io Donna al à nome publicât l’incipit di une, rispuindint che par lôr il furlan e je une antighe lenghe contadine daûr a sparî, che no jentre nuie, par esempli, cun Windows. Nissune peraule rispiet ai erôrs dentri dai articul.
LA LÔR DOMANDE E LA NESTRE_ «Perché dobbiamo continuare a sprecare soldi (nostri) per far tradurre Bertolt Brecht in friulano?» E à vût scrit la diretore di Io Donna tal editoriâl di presentazion de «inchieste» sul so gjornâl.
Pecjât che la traduzion di Brecht «Marie Courage e i siei fîs» e je dal 1977, fate de «Clape culturâl Acuilee» di Gianni Nazzi, cence spindi bêçs publics, ben vincjedoi (22!) agns prime de leç 482/99 di tutele des lenghis minoritariis dal Stât talian! E cussì ancje pai «Ruspiôs», citâts tal stes articul (lait a viodi a pagj. 9 di chest numar).
Di bêçs (nestris) spindûts pardabon, nô o proponìn cualchi altre cifre: intal 2006, il Corriere della Sera al à ricevût 714mil euros tant che «quotidiano italiano teletrasmesso in Paesi diversi da quelli membri dell’Unione Europea»; 8 milions 686mil euro ju à ricevûts la Rcs Quotidiani par vie che e je une des «imprese editrici (…) ammesse al beneficio del credito d’imposta per l’acquisto della carta utilizzata nell’anno 2004»; e altris 3 milions 502mil a Rcs Periodici pal stes motîf.
Nô o si fasìn une altre domande (intant che o doprìn, ancje cence il lôr permès, Windows e Macintosh par scrivi): cuâi sono i bêçs strassâts, viodût che i nestris a son lâts a un gjornâl che nol verifiche lis notiziis che al publiche e nol lis retifiche se a risultin sbaliadis?
Redazion